Shillong, Lber 09: U Myntri ka tnat jngohkai pyrthei (Tourism) ka jylla bah Paul Lyngdoh hynne ka sngi Palei, ula pynpaw ia ka jingdonkam ban kyntiew shuh shuh iaka kam jngohkai pyrthei namar ka Meghalaya kadei jylla kaba la shah kyrkhu naka jingdon ki jaka ba itynnad tam.
Haba kren sha ki lad pathai khubor u bah Paul ula ong ba ka donkam ban peit biang sa shisien bad ban khmih bha shuh shuh kumno ban kyntiew ia kane ka kam jngohkai pyrthei hapoh ka jylla baroh kawei.
U bah Paul ula ong ba ka kam jngoh kai pyrthei ka dei kaba kiew bad ïaid bha hapoh ka jylla Meghalaya bad ki dang don shibun kiei kiei kiba ka sorkar lane ka tnat kadei ban leh khnang ba baroh ki longïng kin ioh jingmyntoi na kane ka kam.
“Ka Meghalaya kala shah kyrkhu haka jingdon ki jaka ba itynnad bad dei namar kane ka la donkam ban peit biang sa shisien bad ban khmih bha na kaei kaba ju long sha kaei kaba dei ban long namar ka kam jngoh kai pyrthei hi ka dei kaei kaei kaba kiew bha ha kane ka jylla” la ong u bah Paul.
U bah Paul ula ong ba ka tnat jngohkai pyrthei kan sa leh shibun ki kam haba iadei bad kane bad lyngba ka jingdon ki kynhun kan lah ban nang kyntiew shuh shuh ia ka kam jngohkai pyrthei daka ba pyndonkam ïa ka jingdon ki jaka ba itynnad hapoh ka jylla.
Kum ban shu pynkynmaw ba u bah Paul Lyngdoh uba dei ruh u MLA ka United Democratic Party (UDP) na West Shillong konstitwensi ula shah bhah kam kum u Myntri ka sorkar jylla bad un khlieh iaki 4 tylli ki tnat ba kynthup ïa tnat kam jngoh kai pyrthei (Tourism), ka tnad Social Welfare, ka tnad Arts & Culture bad ha ka tnad Textiles.
U bah Paul ula ong ba un hun beit ia kano kano ka bhah kam ba la bhah ïa u bad un ïaleh katba lah ban leh ïa kaba bha tam ban wanrah ïa u soh bad ban pynsah kynmaw ha ka jingim daka ba bat kum u khlieh jong kine 4 tylli ki tnat treikam sorkar.
Ula ong ba baroh 4 tylli ki tnat kata ka tnat kam jngoh kai pyrthei, ka tnad Social Welfare, ka tnad Arts & Culture bad ka tnad Textiles ki dei kiba ïadei hajuh bad ka jingkwah jong u ka long ban khmih bniah ban pyntikna ban pyndonkam naka bynta ka jingmyntoi ki paidbah bad ka jylla baroh kawei.
