Nongstoiñ, Lber 9: Ka Woodland Hospital, Shillong, hynne ka sngi kala leit ban ai jingpynshai sha ki paidbah halor ki jingpang khyllai ha Nongstoiñ, kum shi bynta ban rakhe ia ka sngi ka jingpang khyllai ne World Kidney Day.
Ïa katei ka jingialang ai jingpynshai paidbah la pynlong ha ka Market Complex ha ïew Nongstoiñ ha kaba ka Dr. Indakiewlin Kharbuli MBBS MD (Medicine), DM (Nephrology) Consultant Nephrologist kala shim ia ka bynta ban ai jingpynshai.
Ka Dr. Kharbuli kala ong baka jingpang khyllai kadei ka jingpang kaba pyniap suki suki ha kaba bun ki nongpang kiba don jingshitom ha u khyllai kim tip ba ki pang khyllai namar ka jingbymdon ka jingpyni dak.
Ka la ong ruh baka jingpang khyllai ka don haduh 5 bynta kata ka bynta ba 1 haduh 4 ka dei kaba lah ban sumar da kaba ai dawai hynrei kaba bynta kaba 5 ka dei kaba la jur bad hap pynkhuid ia ka snam lyngba ki kor ne Dialysis bad ruh ban bujli ia u khyllai.
Kala ong ba ki lad jingiada naka jingpang khyllai ka long ban dih 2 liter ka um ha ka shi sngi, kiar naka jingbam doh masi, kiar na ki jingbam mluh, sangeh ka dih ki dawai ktha bad sangeh sih sikret lane kyiad.
Ha kane ka sngi kala don ruh ka jingsumar ei ia ki paidbah kiba la wan ban shah sumar ha ka Woodland Hospital Blood Collection Center kaba don ha ka dong Mawpun jong ka shnong New Nongstoiñ.
