Shillong, Rymphang 16: Ka seng saiñ pyrthei Khun Hynniewtrep National Awakening Movement (KHNAM) kala ther ia u National General Secretary ka BJP u Rituraj Sinha halor ka jingong ba ka BJP kan iatai shwa halor ka jingdawa pyntreikam iaka ILP hadien ka elekshon bad kala shu pynsah teng ia katei ka jingdawa mynta la 4 snem ha Delhi.
U Vice President ka KHNAM u Bah Thomas Passah ula ong, “Ka Inner Line Permit (ILP) kala sahteng ha Delhi la 4 snem bad ka jingong u Rituraj Sinha ba dang hap ban iatai bha hadien ka elekshon, ka long kaba sngew thamula bad ka jingkylli kaba mih ka long, ha kine ki saw snem ba la dep hato ka ILP ka la shu sahkut tang ha ki almari ha Delhi?.
Une u nongialam ka KHNAM ula ong, ka Sikkim kaba la paw bha kum kawei na ki jaka jngohkai pyrthei ha ka Ri India bad pyrthei baroh kawei ka don ia ka Restricted Area Permit (kaba long kum ka ILP) bad ruh ia ka Protected Area Permit bad kine ki jingpyrkhing ki khlem pynhiar ia ka kam jngohkai pyrthei hynrei ka dang kyntiew pynban. Kumta ka jingong jong u Rituraj Sinha ba ka ILP kan kthah ia ka kam jngohkai ka long kaba bakla shibun.
“Ka ILP kadei ban iada ia ka hok longtrai jong ngi ki rit paid kumba la iohi jngai da ki bor synshar phareng kiba la kynthup ia ka Ri Khasi ha ka BEFR 1873, namar kata, ka ILP ka long kaba donkam bha bad ngim lah ban iapieñ ia ka hok longtrai jong ngi bad ka spah, namar dang lah ban longtrai ha ka jingduk ban ia ka jingriewspah ha ka jinglong mraw” ong u Bah Passah.
Ka seng ka shim ruh ba ka sorkar ba rim bad baroh 60 ngut ki MLA ki la shu mynjur arsap ia ka Resolution ILP ha u snem 2019, namar ym iohi ba kan don ka jingbuddien bad ka jingtynruh ba shong nongrim ha kine ki saw snem ba la leit.
“Ha ka 11 tarik u Nohprah 2019, ka Sorkar MDA kala pdiang da ka jingkmen ia ka Notification jong u President ka Ri India kaba la weng noh ia ka kyntien Khasi-Jaintia na ka Preamble jong ka Eastern Bengal Frontier Regulation Act 1873 bad ngim iohi ba kan don ka jingpyrshah lane ka jingmudui pyrshah ia kane ka notification namar ka jingweng iaka kyntien “Khasi-Jaintia” naka BEFR 1873 ka pynkhien im im peit peit ia ka clause (3) (a) jong ka Article 372 kaba la kren shai “Nothing in clause (2) shall be deemed – (a) to empower the President to make any adaptation or modification of any law after the expiration of (three years) from the commencement of the Constitution ..” ong u Bah Passah.
Ula ong, ka bor ban pynkylla ia kum kine ki kyndon aiñ ha kano kano ka por, ka shong beit tang ha ka Parliament.
“U Bah H.S Shylla kum u CEM ka KHADC ula mudui pyrshah ia kane ka Notification hynrei hadien ka jingkhlad noh jong une u nongialam, wat ka KHADC ruh ka khlem shimti ia kane ka kam” la pynkut u nongialam ka KHNAM.
