Assam | Ai jingmynjur ka Kynhun Myntri ia ka UCC ha ka sien iakynduh ba nyngkong hadien ba thaw Sorkar

Guwahati, Jymmang 13: Ka kynhun myntri jong ka sorkar Assam ha ka sngi Balang ka la mynjur ban pyntreikam ia ka Uniform Civil Code (UCC) hapoh ka jylla ha ka jingialang ka kynhun myntri ba nyngkong eh jong ka sorkar ba dang shu thaw thymmai, ha kaba u Myntri Rangbah ka jylla u Himanta Biswa Sarma u la pynbna ba yn sa wanrah ia ka Bill hapoh ka iing dorbar ha ka 26 tarik Jymmang.

Haba kren sha ki nongthoh khubor hadien ka jingialang, u Sarma u la ong ba ia ka jingthmu UCC ha Assam la “pynbeit” ban iada ia ki jaitbynriew riewlum bad ban pynneh pynsah ia ki riti dustur ha ka niam.

“Baroh ki riewlum ha Assam, la ki dei kiba ha lum ne ha madan, kin sah shabar ka jingpeit jong ka UCC.Ki jingleh niam, ki riti dustur ruh yn lait”, la ong u Myntri Rangbah ka Jylla.
Katkum ka sorkar, kane ka ain kaba la tyrwa kan kynthup ia ki mat kum ka rta kaba rit tam ban shongkurim, ka jingpynrung kyrteng pynbor ia ki jingshongkha bad ki jingiakhlad, ka jingpynduh noh ia ka jingshongkha bun tnga, ka hok pateng jong ki kynthei bad ka jingpynbeit ia ka jingiadei bad ka live-in relationships.

U Sarma u la ong ba ka rukom treikam jong ka Assam ka ïapher na kiba la shim ha ki jylla kum ka Uttarakhand, Goa bad Gujarat, namar ka kynthup ïa ki lad jingïada na ka bynta ki trai ri trai muluk bad ki riewlum.

Ka kynhun myntri ka la rai ruh ba ka BJP’s election manifesto na ka bynta ka Assam kan long kum ka “nongrim ba ïalam” na ka bynta ka jingsynshar ha kine ki san snem ban wan.
“Ka manifesto kan long ka nongrim ha kaba yn buh ia ki polisi jong ka sorkar”, la ong u Sarma.

Ha kawei pat ka rai kaba kongsan, ka kynhun myntri ka la mynjur ban thaw ïa ka task force ba la khlieh da u Chief Secretary ban pynkhreh ïa ka lynti ne ka roadmap ban pynmih ar lak tylli ki kam ha ki san snem ban wan, katkum ka jingkular jong ka BJP ha shwa ka por thep vote.

Ka sorkar ka la pynbna ruh ïa ki lad pynduna pisa hapdeng ka jingbym thikna ha ka ïoh ka kot ha ka pyrthei kaba ïadei bad ka jingïakynad kaba dang ïaid shakhmat ha West Asia.
Ka kynhun myntri ka la rai ban nym thied kali sorkar thymmai ha kine ki hynriew bnai ban wan bad ka la buh kyndon ia ka jingleit jingwan shabar ri da ki heh sorkar ha kajuh ka por, lait noh tang ha ki por ba donkam kyrkieh ha ka liang ka koit ka khiah.

Ka jylla kan pynduna ruh ia ka jingpynlut ha ka umphniang na ka bynta ki kali sorkar da 20 percent ha u snem ban wan, kan pynduna ia ki kynhun VIP katkum ka security assessments, kan kiar na kaba thied ia ki mar ba la shna nabar ri haduh hynriew bnai bad kan buh hakhmat eh ban shim wai ia ki kali elektrik na ka bynta ban pyndonkam ha ki kam sorkar.

Nalor kata, ki offline seminar bad ki workshop ba la bei tyngka da ka sorkar yn pynsangeh noh haduh hynriew bnai, katba ki kali sorkar kiba la rim yn pynduh noh.

Ka Kynhun Myntri ka la mynjur ruh ïa ka jingtei ïa ka Museum kaba ₹32 klur kaba la ai nam sha u nongioh khusnam Bharat Ratna u Bhupen Hazarika ha Guwahati bad la rai ban pynlong ïa ka jingïalang pynkut ïa ka jingrakhe ïa ka jingdap shispah snem ka jingkha jong u ha New Delhi.

U Sarma, u la kdew ruh ba ka jingpynheh ia ka kynhun myntri jong ka Assam, ka lah ban long ha ka taiew ba nyngkong jong u bnai Jylliew, hadien ba la pynkut ia ka dorbar dorbar ba nyngkong jong ka sorkar ba thymmai, kaba la buh ban sdang ha ka 21 tarik Jymmang.