Shillong, Jymmang 13 : Ki paidbah ka Shnong Lapangap, kaba don ha khappud ka West Jaintia Hills bad ka West Karbi Anglong, Assam, ha ka sngi Balang, kila wan tur paidbah sha Secretariat, Shillong, ban pynbor ia ka Sorkar Jylla ba kan ai ia ki lad jingiada bad ka jingshngain ia ki nongshongshnong ka thain, khamtam ki nongrep kiba la mad ia ka jingshah pynjulor ki jingthung jingtep bad ki lyngka ha ki paid Karbi.
Kane ka jingiatur paidbah kala wan jia hadien ba ki nongrep ka Lapangap kila mad ia ka jingthombor jong ki paid Karbi, kiba la wan ha ka por mynmiet ban pynjulor ia ki lyngkha bad ki jingthung jingtep, kaba ki nongrep ka Lapangap kila dep lur baroh shisngi.
Ki paidbah na Lapangap kila wan da ki bos na Lapangap bad kila ialum paidbah ha madan Malki ha ryngkat ka jingiadon lang ki katto katne ki kynhun Sengbhalang kynthup ka Khasi Students’ Union (KSU) bad Jaintia Students’ Movement (JSM), hashuwa ban iatur paidbah sha Secretariat.
Ki Pulit ka East Khasi Hills kiba la pynkhlain bha ia ka bor pahara bha ha IGP Point, kila khang lynti ia ki paidbah ba kin tur sha Secretariat, haba kyntu ia ki ba kin sangeh noh naba ka Sorkar kala khot ia ki ban wan sha ka jingiakren.
Ki paidbah kim shym la sngap ia kane ka jingkyntu bad kila pyrshang ban iatur beit shakhmat kaba la pynlong ia ki Pulit ban hap pyndonkam da ki pepper spray bad ka jingbom lathi. La iohi ruh ba ki paidbah kila pyndonkam ia ki siej lama ban pynphai kylla ia ki Pulit. Ha kane ka jingiapyni bor, uwei u nongshongshnong ula shitom na ka jingshah synreit pepper spray.
U President ka KSU-West Jaintia Hills samla Laitphar Syngkrem ula pynrem jur ia kane ka jingpyni bor ki Pulit bad ong “Ngi pynrem jur ia ka jingleh ki bor District bad ki Pulit da kaba khang lynti ia ki nongiakhih. Ka Dorbar Shnong Lapangap ka khlem wan hangne ban thaw ia ki jingkulmar hynrei ban dawa ia ka hok jong ngi, namar ka Sorkar kala leh kyllut bad leh matlah ia ki jingeh ba ki iakynduh”.
“Lada ki kwah ban leit sha ki lyngkha kba, kila shah pyndik ha ki Pulit ka Assam, bad haba ki wan shane sha Shillong, kila shah pynibor ha ki Pulit ka Meghalaya. Lada ngim lah ban trei hala ka jong ka jaka bad lada ngim lah ban pynsngew ia ka sur jong ngi hala ka jong ka jaka, shano pat phi khmih lynti ia ngi ban leit” bynrap u samla Syngkrem.
U iathuh ba ki paidbah kiba la wan poi da 5 tylli ki bos, kila shah pynsangeh ha Malki bad ym shah shuh ia ki ban iaid shakhmat. “Hynrei ngi la rai kut ban iaid shakhmat bad ka jingiaid paidbah kam pher lada long kumno kumno ruh” ula ong.
Kane ka jingiakhih jong ki paid Lapangap la pynsangeh noh hadien ba ka Sorkar kala kular ban sap hah ia ka bor pahara kaba khlain ban pynthikna ba ki nongrep kin ioh ban leit biang sha ki jaka rep ban rep ban riang khlem ka jingshah pynthut, ha ka jingialang bala pyniaid da u Symbud Myntri Rangbah Bah Sniawbhalang Dhar.
Haba kren sha ki nongthoh khubor hadien ka jingialang, u Deputy Commissioner ka West Jaintia Hills Abhinav Kumar Singh ula ong ba ha kane ka jingiakren la iadonlang u Chief Secretary, Principal Secretary, Inspector General of Police, Superintendent of Police, Deputy Commissioner, bad ki nongmihkhmat na ki Sengbhalang bad u Rangbah Shnong ka Lapangap.
“Mynta ka sngi, bun bah ki nongrep na Lapangap kila wan sha Shillong ban pynpaw ia ka jingeh sha ka Sorkar. Hadien ka jingiakren kaba bniah bha, ka mat ba hakhmat eh kaba mih, haba pynshong nongrim ia ki jingdawa bad ki jingeh jong ki paidbah, ka long ba naduh lashai ka sngi, yn sap hah ia ka kynhun SF-10 Commando ban leit pahara ha Lapangap” ong u Singh.
U bynrap ba ia kane ka kam ynsa iakren ruh ha ki kyrdan ba halor duh. “Ngin sa iakren ha ka kyrdan ba halor duh jong ka Sorkar lyngba u Myntri Rangbah bad Symbud Myntri Rangbah bad ia kane ka kam yn sa iakren mynta hi ka sngi. Ha ka kyrdan ki District, u SP bad ma nga, ngin sa leit sha Lapangap ban pynthikna ba ka rep ka riang kan sdang biang bad ban pynthikna ba ka jingsuk ka dei ban don ha ka thain” ula ong.
Halor ka jingiakren pud, u DC ula ong “Ha kine ki sngi ban wan, ka Peace Committee kan sa pynbeit biang ia ka jingiakren ka bym shym la don haduh mynta, namar ka Assam ka dang shu dep thaw Sorkar bad kan dang ban pynbna ia u Chairman jong ka Regional Committee. Hapoh lashai kasngi, ka jingiakren kan sa sdang bad nga ngeit skhem ba ka jingsuk kan wan phai biang”.
U Superintendent of Police ka West Jaintia Hills Jagpal Singh Dhanao, ula kular ia ki nongrep ba ki Pulit ka District kin ai iaka jingiada kaba pura ia ki.
“Na ka liang ki Pulit ka Jylla, ka kam jong ngi ka long ban pynthikna ia ka jingshngain bad jingiada ia ki nongrep kam pher la ka long ha kano kano ka rukom. Ngin pynthikna sha phi ba to ngin ia leit phai biang shala shnong bad sdang biang ia ka kam rep naduh lashai ka sngi” ula ong.
