Shillong, Jymmang 13: Hynniew ngut ki nongthawain ka jylla Meghalaya kila iashimbynta ha ka State Legislators Leadership Programme kaba lai sngi ha Bengaluru, da ka jingthmu ban pynkhlain ia ka kam thawain bad ban sngewthuh ia ki polisi ha kaba iadei bad ka synshar paitbah bad ka jingmih ki jingtynjuh ha kaba iadei bad ki kam pynroi.
Ia kane ka prokram la pynlong ha ka 10–12, tarik u Jymmang 2026 ha Azim Premji University, Bengaluru, ia kaba la pynlong lang da ka Azim Premji University bad ka PRS Legislative Research.
Ia ka Residential Leadership Programme kadei kaba la pynwandur ban pynkhlain ia ka jinglah ki nongthawain lyngba ka jingpynleit jingmut ha ki jingiatai halor ka kam synshar paitbah, ki polisi paitbah, jinglong nongialam bad ka jingmih ki jingtynjuh ha kaba iadei bad ki kam pynroi.
Ka kynhun na Meghalaya ka kynthup ia u Deputy Speaker bad u MLA ka Raksamgre u Limison D Sangma, u MLA ka Nongpoh u Bah Mayralborn Syiem, u MLA ka Umsning u Dr. Celestine Lyngdoh, u MLA ka Mylliem u Bah Ronnie V. Lyngdoh, u MLA ka Nongstoin u Bah Gabriel Wahlang, u MLA ka Mawsynram u Bah Ollan Sing Suin bad u MLA ka Mawphlang u Bah Matthew Beyondstar Kurbah.
Ha kane ka prokram la don ka jingiamir jingmut bad ki riewshemphang da ka jingthmu ban kyntiew ia ka jingryntih ha kaba iadei bad ki kam thaw ia ki ain ki kanun bad ban sngewthuh ia ki polisi treikam.
Ki mat kiba kongsan ki kynthup kumno ban long ki nongthawain kiba tbit, ban pynleit jingmut ha ki kamram kum ki nongthawain bad ki atiar kiba don na ka bynta ki nongthawain bad ki mat kiba kongsan kiba iadei bad ka pule puthi, ban khmih bniah ia ki jingtynjuh bad ia ki lad ki kabu hapoh ka ri India halor ka pule puthi.
Ha ka jingialang la iatai ruh halor ka koit ka khiah ia baroh, ki jingsngewkhia ki paitbah ha kaba iadei bad ka koit ka khiah bad ki polisi kiba lah ban treikam, ban sngewthuh halor ka jingpyndonkam ia ka pisa paitbah bad ka kamram kaba kongsan jong ki nongthawain ha kaba iadei bad Mang Tyngka.
Ki nongiashimbynta kila iakren ruh halor kiwei kiwei ki mat kaba kynthup ia ka jingkylla lyngba ka jingdon jongka Artificial Intelligence ha man la ki liang kum ha ka koit ka khiah, ka pisa pilain, jingai jingshakri ia ki nongshong shnong bad kumjuh ia ki jingeh kiba iadei bad ka jingiohkam ki samla, ka sap ka phong bad ka rukom pynwan na ka jingpule sha ka jingkamai.
La pynlong ruh ia ka jingiakren kyrpang ha kaba iadei bad ki lad pyniasoh bad ki kor digital bad ban wad ia ki lad ki lynti ban pyndonbynta ia ki paitbah lyngba ka jingthaw ia kiei kiei kiba phylla ha kane ka juk Digital.
