Pynrem u Conrad Sangma ia ka jingshah pyniap ki nongialam ka Balang Baptist ha Manipur | Dawa pynkloi ia ka jingbishar ba hok

Shillong, Jymmang 13 : U National President ka National People’s Party (NPP) bad Myntri Rangbah ka Jylla Conrad K Sangma, ula pynrem jur ia ka “jingpyniap kaba shyrkhei bad ba khawpud” ia ki nongialam ka Balang Baptist ha Manipur haba dawa ban leh eiei noh mar mar na ka Sorkar Pdeng bad Sorkar Jylla ban wanrah ia ka nongleh bymman sha ka jingbishar kaba hok.

Deeply disturbed and anguished by the attack on TBA Church leaders in Kangpokpi District, Manipur. Such acts of unprovoked violence and brutality against leaders who work to foster peace, unity, and brotherhood are unacceptable and must be strongly condemned. I urge the…

— Conrad K Sangma (@SangmaConrad) May 13, 2026

Ha ka kyrwoh, u Conrad u la niew ia kane ka jingthombor ïa ki pastor bad ki nongtrei balang kiba khlem tiar kum ka kam “kaba pynduh mynsiem shikatdei bad kabym lah ban pdiang satia ha kano kano ka imlang sahlang kaba la shai.”

“Ki lanot, kiba dei ki dkhot ba don burom jong ka Jaidbynriew Kuki Baptist bad kiba ïasoh bad ka Manipur Baptist Convention bad ka Kuki Church Leaders Forum, ki la aiti ïa la ka jingim ban btin lynti ba kynja mynsiem, ban tei ia ka jingsuk bad ban shakri ia parabriew” ula ong.

“Ka jingthombor ïa kum kine ki briew kam dei tang ka jingthombor ïa ki mynsiem kiba lui lui hynrei ka dei ruh ka jingthombor kaba khraw ïa ka jinglong iatylli, ka jingsngewlem bad ka jingia im lang ryngkat kaba tehsong ia ka imlang sahlang jong ngi kum kawei” ula bynrap.

U nongïalam ka NPP u la ong ba ka seng ka ieng lang bad ki longïing kiba la duh bad ka kynhun Baptist ki Kuki baroh kawei ha kane ka por ka jingsngewsih kaba khraw. “Ngi ai ïa ki jingsngewlem naduh ka dohnud bad ki jingduwai na ka bynta ka jingshongsuk bymjukut jong kito kiba la duh ïa la ka jingim, bad ngi angnud ïa ka jingkoit kaba kloi bad kaba pura ïa kito kiba la mynsaw ha kane ka jingjia kaba shyrkhei.”

Ha kaba khot ïa ki bor khmih ba kin leh eiei mardor, u Myntri Rangbah u la kyrpad ïa ka sorkar India bad ka sorkar Manipur ban shim mardor ïa ki sienjam kiba tyngeh.

“Dei ban don ka jingtohkit kaba bniah, kaba shai, bad kaba buh da ka por ban pyntikna ha ka ban thuh ia ki nongleh ïa kane ka kam bymman bad ban wanrah ia ki sha ka jingbishar khlem da pynslem. Ka jingkitkhlieh ka long kaba donkam ym tang ban ai ka jingbishar ba hok ïa kiba shah thombor hynrei ban wanrah biang ïa ka jingshaniah hapdeng ki kynhun kiba shah ktah,” u la ong.

U Nongïalam ka NPP u la kyrpad ruh ïa ki bor khmih ban “pynkhlaiñ ïa ki lad jingïada ki ban pyntikna ïa ka jingshngain bad ka jingïada ïa ki kynhun kiba tlot, khamtam ha ki jaka kiba la shah ktah da ka jingïakynad.”

“Ka jingthombor kaba man ka por ïa ki riew paidbah bad ki nongïalam jong ki kynhun Jaidbynriew ka pyni ïa ka jingdonkam ba kyrkieh ïa ka jingtuklar kaba kham khlaiñ bad ki sienjam ban khanglad,” u la ong, haba pynskhem biang “ïa ka jingdonkam jong ka jingïakren, ka jingïapynbeit, bad ki jingpyrshang lang na ka bynta ka jingsuk.”

“Ka jingthombor kam ju long ka lad jingpynbeit ïa kano kano ka jingeh, bad kum kine ki kam ki nang pynjur ïa ka jingsngew ïapher bad pynjlan ïa ka jingjynjar,” bynrap u nongïalam ka NPP.

U Conrad u la kyrpad ruh ïa “baroh ki kynhun kiba don bynta, kynthup ïa ki sengbhalang, ki nongïalam jong ki kynhun Jaidbynriew, bad ki nongshong shnong, ba kin ïawan lang ha ka mynsiem ka jingïatylli bad ban trei lang na ka bynta ban wanrah biang ïa ka jingsuk, ka jingshong suk shongsain, bad ka jingshaniah markylliang ha Manipur bad ha ka thaiñ Shatei Lam Mihngi baroh kawei.”