Shillong Nohprah 06: U MLA ka BJP u Bah Sanbor Shullai bad ka BJP South Shillong Mandal hynne ka sngi Baar kila pynkup burom iaki 658 ngut ki nongtrei kiba trei iaki kam bapher bapher kum ka dak ban ai mynsiem iaki ba kin iai bteng ban ai jingshakri ia u paidbah.
Kitei ki 658 ngut kiba la shah pynkup burom ki kynthup ia ki nongniah taksi, nongsait jaiñ, nongtrei bylla ha ki iing briew, ki nongshna iaki kor um, nongsar surok, ki nongtrei Anganwadi, ki ASHA bad kiwei kiwei. bad ia kine la pynkup burom haka jingialang kaba la long ha Soso Tham Auditorium.
Haba kren haka jingialang u Bah Sanbor ula iaroh ia kine baroh kiba la noh synniang bha iaka imlang sahlang da ka jingtrei iaki kam ki bapher bapher bad ula ong lada kitei ki nongtrei baroh ki pynlong iaka jingsangeh treikam kan pynkhih win iaka jylla baroh kawei bad kan buh ia u paidbah ha ka jingeh kaba khraw.
U Bah Sanbor u la iathuh ba u MLA u ioh T.2 Lak 3 hajar tyngka kum ka tulop man la u bnai bad kumta ula pynlang kyrpang iaka pisa kaba kot T.14 Lak naka bynta ban ioh pynkup burom ia kitei ki 658 ngut ki briew ia kiba trei ia ki kam ki bapher bapher bad ula ong, ha ki snem ban wan yn sa nang pynkiew shuh shuh iaka bhah tyngka naka bynta ban ai jingiarap ia ki bad yn leh beit ia kane katba u dnag im haka pyrthei.
U la ong, bunsien la ai jingithuh tang ia ki briew kiba paw ha ki kam bapher bapher hynrei ka long ruh kaba kongsan ban ithuh ruh ia kine ki briew ba watla ki trei ia ki kam kiba rit hynrei kila noh synniangshi katdei pat iaka imlang sahlang.
Ha katei ka jingialang la wan ban don lang ki Rangbah Shnong jong ka thain Laban, ki nongialam ka BJP bad kiwei kiwei.
