Shillong, Nohprah 06 : Ka Sorkar Meghalaya Democratic Alliance (MDA) kala pynmih ia ka hukum dang shen, ba khein be-ain ia ka jingthungkam Adhoc haba tynrong ia ka jingbahkhlieh ha kino kino ki bor kiba pynkhein ia kane ka hukum.
Ia kane ka hukum la pynmih da ka Commissioner & Secretary ka Tnad Personnel & Admv Reforms (B) ka Sorkar Jylla Kong R Lyngdoh (IAS) ha ka 21 tarik Naiwieng 2022.
Kat kum kane ka hukum la ong lada dang don kum kane ka jingthungkam (Adhoc) ha kaba ki bor pyniaid ki dang thungkam Adhoc ne Temporary khlem da iaid ia ki kyndon, ia ka Bill (tulop) jong kine ki Nongtrei yn ym pyniaid shuh lyngba ka Employees Database System bad ki Treasury Officer kin hap ban khmih bniah bha ban nym pdiang ia ka jingsiew tulop.
La ong ruh ba kino kino ki bor khmih ba dang thungkam Adhoc ne temporary kin hap ban shim ia ka jingbahkhlieh halor ka jingpynkhein ia ka jingbthah.
Nalor kane, la ong ruh ba ka Sorkar ka lah ban shim ia ka sienjam ban pynngat ha ka jingtohkit pyrshah ia kine ki Ophisar bad ban khate ruh ia ka jingsiew ia kine ki Nongtrei (Adhoc) na ka tulop jong ki Nongthungkam/pension (lada lah shongthait) bad kiwei kiwei ki jingmyntoi ba ioh da kine ki nongthungkam.
La bthah ruh ia ki bor khmih jong baroh ki Tnad Sorkar ba kin lum jingkhein ia ka jingdon jong ki kam ba lait ha ki Tnad bad ia kaei kaba lah ban lait ha ki snem ban wan bad haba bud ryntih ia ki jingbthah haba iadei bad ka jingpynkhrah ia ka roster system kat kum ka Department Office Memorandum No. PER (AR) .25/2022/pt.III ba 10/05/2022, ia kine ki kam ba lait dei ban pyntip sha ka MPSC/DSC /Department Selection Committee ba kin thungbriew ha ka lynti kaba dei.
