Shillong Nohprah 06: Ka Chairperson ka Meghalaya State Commission for Women (MSCW), ka Kong Phidalia Toi ryngkat bad u Director jong ka tnad Social Welfare, u DD Shira, hynne ka sngi Baar kila pyllait paidbah iaka phlim lyngkot kaba la ai kyrteng ‘Kein Noh!’ ha ka jingialang kaba la long ha ka ophis treikam jongka Social Welfare.
Ia katei ka phlim la bei tyngka da ka Tnad Social Welfare bad la pynmih pat daka MSCW ha kaba ka jingthmu jong katei ka phlim ka long ban pynsngewthuh iaki mat kiba iadei bad ki kynthei khamtam haba ka National Crime Report Bureau (NCRB) kala pynpaw ba kala don ka jingkiew ha ki kam thombor pyrshah ia ki kynthei hapoh ka ri.
“Ngi la shna iaka phlim ‘Kein Noh’ kaba pyni shaphang ki lai tylli ki longiing bad mynta kan shong ha ki nongpeit ia katei ka phlim iaka khubor kaba mih na kitei ki longiing” ong ka Kong Phidalia Toi.
Ha kane ka sngi ka Kong Phidalia ryngkat bad u DD Shira kila pyllait paidbah ruh iaka ‘Report of the Exploratory Study on the Socio Economic Status and Problems of Single Mothers in Meghalaya’.
Ia katei ka kaiphod kaba la pyllait, kadei kaba la wad bniah da ki nonghikai jong ka skulbah NEHU bad MLCU bad kila lap ba ki don bun ngut ki longkmie kiba kamai pyndap marwei iala ka iing ka sem namar ka jingkhlad noh u lok ne namar ka jingphet noh u lok jongki bad kila shem ruh ba bun hi na kitei ki longkmie kidei kiba trei iaki kam bylla kiba rit ban pyndap pynbiang iala ka iing ka sem bad ki don hapdeng ka jingeh katta ban pynneh pynsan iala ki khun bad ban beh kam beh jam.
