Shillong, Nohprah 03: U Myntri Rangbah ka jylla u Conrad K Sangma ha ka sngi Thohdieng ula ong, ka sorkar jylla ka dang ialeh ban pynbeit ia ki jingeh hashwa ban shim ia ka rai ban thaw iaka Sohra District.
“Ngi dang khmih bniah bha ha kaba iadei bad katei ka jingdawa ban thaw iaka District kaba thymmai” ong u Conrad haba jubab iaka jingkylli jong ki nongthoh khubor.
Ula ong, kawei na kiba kongsan bad ka kyndon kaba suk tam ha kaba iadei bad katei ka mat jingdawa ban thaw iaka district kaba thymmai, Block ne Civil Sub-Division, kadei ban don ka jingiamynjur lang bad kam dei ban don kano kano ka jingthud ne ka jingbym hun.
U Myntri Rangbah ula ai nuksa iaka Mairang kaba la ioh iaka district kaba thymmai da ka Eastern West Khasi Hills da kaba ong “Kala don ka jingmynjur lang jong baroh bad ka jingpynwandur ia u lain ruh ka long ka suk bad kaba la mynjur da baroh”.
“Ngi la shem ba ha ki katto katne ki jingdawa la kidei iaka Sub- Division, Block ne District, kila don ki katto katne ki bynta ia kaba ym shim la ioh satia iaka jingmynjur lang na baroh ki liang bad kala don ka jingiapher jingmut hapdeng ki shnong bapher bapher kaba la pynmih iaka kynrum kynram” ong u Myntri Rangbah bad ka ong, “Ha ka jingpyniaid shakhmat iaka kam da ka jingthmu ban iarap iaki paidbah bad ban pynthikna ba ka jingai jingshakri ka sorkar kan nang khamjan shuh shuh sha u paidbah, hynrei lada ka rai ka ialam pynban sha ka jingeh bad jingjynjar kumta kan ym pynurlong iaka jingthmu baroh”.
U la ong ki kam ki jam ki dang iaid shakhmat ban iakren bad ki paidbah bad ban pynbeit ia katei ka mat.
“Ngi don iaka jingthrang ban iohi ba kan don ka jingiakren bad jingiasyllok bad ki paidbah da kaba iaid ha ka lynti ba kan ym mih ka kynrum kynram ne jingsngew iapher jingmut bad kane ka kam ka dang iaid shakhmat. Kumta haba ngi iaid shakhmat, ngin pyrshang ban weng ia ki jingeh iaki katto katne ki mat bad ngin iasyllok bad ki paidbah bad hadien katei ngin sa rai bad ban shim iaki sienjam nangne shakhmat” la pynkut u Conrad.
