Aizawl, Naiwieng 03 :Ki kynhun aijingiarap hynnin ka sngi Thohdieng kila ioh ban sei ia kawei pat ka metiap na ka jaka ba la jia ka jingtwa khyndew hapoh ka par maw kaba la jia ha Hnahthial, Mizoram naduh ka 14 tarik u Naiwieng 2022.
Ia une u briew ba la ioh ban sei la tip kyrteng kum u Jahidur Islam uba dei na Barpeta district ka Assam.Na ka liang ki pulit kila phah post mortem ia ka met hashwa ban pynkynriah noh sha la ka jong ka shnong.
Kham hashwa 11 tylli ki metiap la ioh ban sei na katei ka jaka, bad ia kine baroh la aiti noh sha la ki jong kiba haiing hasem.
Na ka liang ki kynhun aijingiarap na ka tnat ABCI, NDRF, SDRF, bad na ka Leite Branch jong ka seng Young Mizo Association kila trei khlem shongthait ban wad ia ki metiap kiba dang jah rngai naduh ba katei ka jingjia twa khyndew kala jia ha katei ka jaka.
Nalor kata na ka liang ki pulit ka Mizoram kila pyndonkam ruh da ki ksew kiba la ioh jinghikai kyrpang ban iarap lem ha kaba iadei bad kane ka jingwad ia ki metiap ha katei ka jaka.
Kumjuh kham hashwa, na ka liang u Myntri Rangbahduh (PM) Narendra Modi ula pynpaw ka jingsngew bynniaw halor katei ka jingjia ba sngewsih hadien ba phra ngut ki nongbylla kila duh noh iala ka jingim na katei ka jingtwa bad pynbna ruh ia ka jingiarap pisa kaba mar T.2 lak sha kiba haiing hasem jong kine ki lanot.
Katkum ka khubor heh sorkar, ha kane ka jingjia haduh santylli ki kali tih maw nalor ka mashin tylliat maw bad ka drilling machine kila shah tep ha kane ka jingtwa khyndew kaba shyrkhei ha katei ka jaka.
Kane ka jingjia kala jia kala jia ha ka janmiet jong ka 14 tarik u Naiwieng ba la dep hadien ba ki nongtrei ki dang bunkam ha kaba trei ha katei ka par maw, kane ka long katkum ka jingiathuh da ki bor sorkar.
