Mairang, Naiwieng 21 : U Deputy Commissioner (Supply) ka Eastern West Khasi Hills District, ula maham ia ki nongsam marbam rashon ba kim bit da lei lei ruh ban ai duna ne ot n aka bhah ne shim dor tam ia ki marbam rashon bala sam sha ka Sorkar sha ki paidbah hapoh ka District.
Une u Khliehduh ka District ula maham ia kane haba pynmih ia ka jingpynbna ba ka District kala pyllait ia ki marbam rashon jong u bnai Naiwieng, 2022 sha ki Longiing hapoh ka District kat kum ka National Food Security Act.
Kat kum ka jingpynbna, u DC ula iathuh ba ia u khaw PHH la sam 5 kilo shikhlieh briew ha ka dor T.3 shi kilo, ia u khaw AAY la sam 35 kilo shi card ha ka dor T 3 shi kilo katba ia u khaw Non-NFSA la sam 7.215 kilo shi card ha ka dor T. 13 shi kilo.
Ula pyntip ba ia u khaw bym donkam siew pisa uba wan lyngba ka skhim PMGKAY yn sam 5 kilo shi khlieh briew n aka bynta kito ki longiing kiba don ia ki card rashon AAY bad PHH.
“Ki Nongsam marbam rashon kim bit ban ai duna ne ot n aka bhah bala buh ne mang da ka Sorkar halor ka jingsam ia uno uno u marbam bala ai lyngba ka skhim PMGKAY, NFSA bad Non- NFSA” ong ka jingpynbna.
La bthah ruh ia baroh ki FPS dealer, ba kim dei ban pynduh khaw ia kito ki nongbam ki bym pat don ia u Aadhaar Card bad ia kito kiba la pynjah ia ki ration card jong ki.
Ia ka bai kit bad bai kali ban pynpoi ia kine ki marbam jong kitei ki lai tylli ki skhim, yn bei pisa da ka sorkar sha ki Wholesaler ne Dealer, kumba ju leh na ka por sha ka por bad ha ka jaka sam khaw, la bthah ba baroh kin ieng la kumno kumno shi mitar ka jingjngai iwei na iwei pat ha u lain. Shuh shuh, baroh ki nongshim rashon kin hap ban deng ia ki jingda dur khmat (Mask) ha ki jaka sam khaw.
Une u Khliehduh ka District ula ong ba lada lap ia kino kino kiba pynkhein ia kitei ki kyndon, yn pynshitom katkum ka ain bad lada don kano kano ka jingujor halor ka jingbym thikna ka jingsam ia ki mar rashon, ki nongioh bhah ki lah ban phah da ka jingthoh sha u District Grievance Redressal Officer& Additional Deputy Commissioner (Supply), Eastern West Khasi Hills District, Mairang lane ki lah ban thep ha ka Complaint Box ba la buh da ka office u Deputy Commissioner (Supply).
