Shillong, Naiwieng 09 : Ka Sorkar Meghalaya Democratic Alliance (MDA) kala rai ban wanrah noh da ka State Literary Award, ban ai khusnam sha ki Nongthoh kot ka Jylla kum shibynta ban lah pynriewspah ia ki artylli ki Ktien ki Thylliej ki trai Jylla-ka ktien Khasi bad Garo.
The Cabinet has decided to initiate the Meghalaya Literary Award to Authors. This is being done as per our decision to ensure we promote our indigenous languages & as part of the resolution we passed for the inclusion of Khasi & Garo languages in the VIII Schedule@narendramodi pic.twitter.com/gI3YtwVGhM
— Conrad Sangma (@SangmaConrad) November 9, 2022
Ka Sorkar kala shim ia kane ka rai ha ka jingialang jong ka Kynhun Myntri kaba long hynne ka sngi Balang, kaba la pyniaid da u Myntri Rangbah ka Jylla
“Ngi la leh ia kane ban kyntiew bad pynriewspah ia ki Ktien ki Thylliej jong ngi -ka Ktien Khasi bad Garo bad ban pynkhlain ia ka jingdawa na ka Sorkar Pdeng ba kan pynrung noh ia kine ki Ktien jong ngi ha ka khyrnit ba phra jong ka riti synshar ka ri” ong u Myntri Rangbah ka Jylla Conrad K Sangma haba iakren bad ki nongthoh khubor hadien ka jingialang.
Kat kum ka jingong jong u, nalor ka Resolution bala mynjur da ka Iingdorbar Thaw Ain ban pynrung ia ka ktien Khasi bad Garo ha ka khyrnit ba phra jong ka Riti Synshar ka Ri bad shibynta ban pynbor ia ka Sorkar India ba kan ai jingmynjur, kane ka dei kawei ka lynti ban pynkhlain ia ka jingdawa jong ngi.
U Myntri Rangbah u pyntip ba ia kane ka khusnam yn ai sha uwei/kawei na ki Nongthoh kot Khasi bad uwei/kawei na ki nongthoh kot Garo. Kine ki Nongthoh kot kin ioh da ka khusnam song pisa ba T. 1 lak.
“Ngin sa thung ia ka Committee ka ban khlieh da u Director ba kan bishar ia ki kyrteng jong ki Nongthoh kot kiba thep kyrteng ban ioh ia kane ka khusnam ka ban long manla u snem. Ki nongthoh kot ki lah ban thep hi dalade ia la ka kyrteng ne pynthep da kiwei bad ka Committee kan sa aiti ia ka thup kyrteng sha ka Sorkar ba kan bishar” ula ong.
U Myntri Rangbah ula ong ba kane ka dei kawei pat ka sienjam bala shim da ka sorkar ban tynruh bad pynlong kongsan iala ka jong ka ktien ka thylliej.
