Shillong, Naiwieng 09 : Ka Sor Jowai hynne ka sngi Balang kala rakhe ia ka sngikha u Raja Ram Moham Roy da kaba pynlong ia ka rally ban ialap halor ka jingpynkupbor ia ki Kynthei.
Ia kane ka rally la pynlong da ka Ophis ka District Library, ka Tnad Arts & Culture bad ka Raja Ram Mohan Roy Library Foundation hapoh ka shatri jong ka Ministry of Culture ka Sorkar India.
Kane ka rally ka dei kaba la pynlong ban rakhe ia ka sngi kha ba 250 snem jong u Raja Ram Mohan Roy, u Kpa ka Ri India ba mynta.
U Deputy Commissioner Bah BS Sohliya ula pynshongkun ia kane ka jingrakhe kum u kongsan bad ula kaweh lama ruh ia ka jingiaid rally kaba sdang na Ophis ka District Library. Ki samla pule bad ki Nonghikai na ki skul bapher bapher ka sor Jowai kila iashimbynta ha kane ka rally bad kila rah ruh ia ki placard kiba don ia ki jingthoh halor ka jingpynkupbor ia ki kynthei.
U Bah Sohliya haba ai jingkren, ula pynpaw ia ka jingsngewkhia ba watla ki Kynthei ki dei kiba la khein ryngkat kyrdan bad ki shynrang bad kiba la iohbor ruh ha kiba bun ki kam, hynrei ki Kynthei bad ki Khynnah ki dang iai mad ia shibun ki kam thombor khamtam ha ki katto katne ki jaka ki ba ka jingnang jingstad kam pat poi.
U Bah Terence Sawian uba pyniaid ia kane ka rally, ula kren halor ka synniang bala noh da u Raja Ram Mohan Roy sha ka jingpynkuobor ia ki Kynthei. Ula kdew ruh ia ka synniang jong u Raja Ram Mohan Roy uba la iakhun pyrshah ia ka jingpyn iashongkha khynnah, ka sati bad kiwei kiwei.
