Shillong, Naiwieng 09: Ka Kynhun Myntri ka sorkar Meghalaya Democratic Alliance (MDA) hynne ka sngi Balang, kala ai jingmynjur ban ithuh noh iaki 3635 ngut ki nongtrei ba shipor kum ki nongtrei ba pura ka sorkar.
This one-time decision that has been taken only for this particular case will also include the pension benefits to employees that have retired or have passed away.
— Conrad Sangma (@SangmaConrad) November 9, 2022
Ia kane la pynbna da u Myntri Rangbah ka jylla u Conrad K Sangma u ba la iathuh ruh ba kine ki nongtrei kidei kiba la shah thungkam shipor hashuwa ka 31 tarik Nohprah 2007 bad ia kane ka rai la shim ruh kum shi bynta ban bud ryntih iaka jingbthah ka Supreme Court.
Haba kren sha ki lad pathai khubor u Conrad u la iathuh ba iaki 3635 ngut ki nongtrei la thung kum ki nongtrei ba shipor bad ka jingthungkam iaki hashuwa 2007 ruh kam dei katkum ki kyndon ka MPSC ne DSC ne lyngba ka 3F Notification hynrei la shu thungkam iaki kum ki nongtrei ba shipor ha ki kam ba la mang ha ki tnat bapher bapher.
“Kum shi bynta ban bud iaka jingbthah ka ïng bishar ba khlieh duh ka Supreme Court, ka sorkar jylla ruh kala rai ban ithuh noh iaki 3635 ngut ki nongtrei kum ki nongtrei ba pura ka sorkar bad kine ki nongtrei ruh kin sdang ioh noh iaki lad jingmyntoi kum ka bai bam tymmen bad kiwe kiwei de” la ong u Conrad.
U Conrad u la iathuh ruh ba lada don ki nongtrei kiba la shong thait lypa lane ki ban sa shong thait kin ioh iaka bhah bai bam tymmen bad kumjuh ruh lada don na kine ki nongtrei kiba la khlad naka liang ki baha ïng hasem jong kita ki nongtrei kin ioh iaka bai bam tymmen ne kino kino ki lad jingiarap.
