Shillong, Risaw 21: Ka Joint Action Committee Against Shillong Ropeway Project kala kyntait ia ka jingthmu ka sorkar ban ai jingbatai tang ia ki nongshong shnong jongka Laban Pyllun bad kala dawa ba baroh ki nongshong shnong ka Shillong dei ban kynthuplang ha katei ka jingiakren.
Haba kdew ia ka shithi jong ka sorkar kaba ha ka 19 tarik u Risaw, ka Secretary ka JAC ka Dr Linda Marbaniang ha ka sngi Balang kala ong, ba katei ka mat kadei kaba sngewkhia da ka sor baroh kawei.
“Ia kane yn ym lah ban rai tang da ka Laban Pyllun marwei. Ngi dap da ka jingsngewkhia” kala ong.
Ka Dr Marbaniang kala kyntu ia ka sorkar ban khot ia ki paitbah kiba shaniah ha u Lum Shillong na ka bynta ka um, Umiam na ka bynta ka bording elektrik bad ki tyllong um jong ka Mawphlang hapoh jongka Greater Shillong Water Supply Scheme.
“Ngi ngim shim la leh kum ki bym burom ia phi. Ngi shu pynpaw ia ka jingsngew khuslai. Kum ka nongshong shnong ka Shillong, ngi donkam ia ka um, ym ia ka Ropeway,” kala ong bad ka kynnoh ba ka sorkar kala pyndonkam da ka polisi ban phiah bad synshar ne ka ‘divide and rule policy’.
Ka JAC kala dawa ba ia katei ka projek dei ban pynkynriah noh sha kawei pat ka jaka, kaba kham donkam bha ia ka bad buh jingkylli balei ka shnong Lawsohtun kaba don hajan ka Lumparing bad Bishnupur kala shah iehnoh.
“Ka Lawsohtun kadei shi bynta bad ngi. Kynthup lang ia ka ha ka jingialang kaban khot pynlong ha ka 22 tarik u Risaw” kala ong.
Kala kyrpad ruh ba dei ban pynkynriah noh ia katei ka jingialang ha ka 22 tarik, da kaba kynthup lang ia ki nongshong shnong na Iewduh, Mawkhar, Jaiaw, Motphran, Riatsamthiah, Wahingdoh, Umsohsun, Laitumkhrah, Malki, Upper Shillong bad na Ri-Bhoi.
“Baroh ki briew kiba sah hangne ki donkam ia ka um, ym tang ki briew jong ka Laban Pyllun. Sngap lem ia ka sur ka jong ngi” kala ong.
“Ngi ngim dei satia ka kynhun ki biej. Sngewbha wat nym kheiñ kai ia ngi. Ngi dei ki jingthaw jong u Blei bad u Blei ula ai ha ngi ia ka bor ban iada ia ka mariang ym ban pynjulor noh ia ka. Ka um kadei ka jingai sngewbha jong u Blei sha ki briew bad phim lah ban shim jubor noh ia ka hok ban im” la bynrap ka Dr Marbaniang.
