Shillong, Risaw 21: Ka jingpeit bniah kaba la leh da ka Andhra Pradesh Community-Managed Natural Farming (APCNF) Programme ha ka shnong Mukhla Sohshrieh jong ka West Jaintia Hills district kala pyni ba kala don ka jingkiew haduh 58% ka jingseisoh jong u kba hapoh ka jingrep tynrai ban ia kaba rep da kaba pyndonkam ia ki dawai rep.
Kane ka jingwad bniah kala khmih bniah ia ki 300 tylli ki kba kiba jrong ha baroh ar tylli ki rukom rep. Ka pynthor kaba la rep tynrai ia u kba kala seisoh bha bad ha ka jingjrong jong une u kba, ka jingmih bha u kba bad ha baroh ki liang. Na ka jaka kaba 25-square-metre lyngba katei ka jingrep tynrai la pynmih 13.22 kg u kba, haba ianujor bad ka jingpynmih kaba long 8.34 kg na ka rukom rep kaba pyndonkam ia ki dawa rep.
Ha ka jingrep tynrai la rekod ba une u jingthung ula don ia ka jingjrong kaba long
139 cm katba ha ka jingrep kaba ai dawai rep ka jingjrong une u jingthung ka long 110.2 cm. Kala pynmih ruh 15 tylli ki shnad na u tynrai, katba ha ka jingrep kaba ai dawai la pynmih tang 6 shnad ha kawei ka jaka rep.
Ha man la ki bynta jong ki tynrai na ka rukom rep tynrai la pynmih 147 tylli ki kba katba ha ka jingrep da kaba ai dawa, ka rekod jong ka jingpynmih ka long 128 tylli ki kba.
Kane ka jinglap, ka pyni ia ka jingbiang bha jong ka jingrep tynrai ha ki jaka lum jong ka Meghalaya, ha kaba ka rukom rep ka donkam ban iahap bad ka jinglong jingman jong ka khyndew bad ka suiñbneng.
Kane ka jingpyrshang ka kdew ruh ba ka jingrep tynrai kala pynduna ia ka jingrep kaba shaniah ha ka jingpyndonkam ia ki dawai rep bad ka kyrshan ruh ia ka jingkoit jingkhiah jong ka khyndew bad ka jingpynmih ia ki jingthung kiba lah ban iai shah.
Ka APCNF programme kadei ka rukom rep kaba la lamkhmat da ki kynthei kaba dei ka sienjam kaba la shim da ka Sorkar jong ka Andhra Pradesh. Ka rukom treikam ka jongka kadei kaba la leh ha ki 22 tylli ki Jylla jong ka ri India bad kyntiew ia ka jingrep kaba duna ha ka jinglut jingsep lyngba ka jinghikai hapdeng ki nongrep bad ki jingdon jingem hapoh jong ki shnong ki thaw.
Kane ka jingseisoh ha ka shnong Mukhla Shohshrieh ka tyrwa ia ka jingpynshlur kaba la urlong ha ka rukom rep tynrai. Hynrei ka jingpyrshang bad ka jingkhmih bniah ha kylleng ki jaka, aiom bad ka jinglong jingman jong ka rukom mih kan lah ban ai ia ka dur ka dark aba shai kdar, la kane ka rukom rep kan dei kaba seisoh ha kylleng ki jaka jong ka jylla Meghalaya.
