Shillong, Risaw 21 : Ka Shillong kala sakhi ia ki jingjia kawang petrol bomb ha ki lai tylli ki jaka ha ka sngi Ba-ar, ha ka thain Kench’s Trace, Keating Road bad Laitumkhrah, ong ki Pulit ha ka sngi Balang.
U Superintendent of Police ka East Khasi Hills Bah Vivek Syiem ula pyntip sha ki lad pathai khubor ba ym shym la don kano kano ka jingjulor ne jingmynsaw briew ha kine ki jingjia.
“Kine ki jingkawang petrol bomb kila jia hynnin ka sngi ha ki lai tylli ki jaka, kawei ha Kench’s Trace, kawei ha Keating Road bad kawei ha Laitumkhrah, hynrei ym shym la don kano kano ka jingjulor, ne jingmynsaw briew” ong u Bah Vivek.
U iathuh ba ki Pulit kila shim ia ki lad jingiada ha kylleng ki jaka jong ka nongbah.
“Ki Pulit kila shim ia ki lad jingiada bad ngi la pynieng ia ki jaka talasi kali ha kylleng ki jaka ban tehlakam ia ki riew runar na ka jingkawang petrol bomb lane ban buh jingma iano iano. Ngin sa pynkhlain ia ka jingiaid pahara, ngin sa pynkhlain ia ka jingtalaasi, ngin sa pynkhlain ia baroh ki kam jong ki Pulit” ula ong.
U Bah Vivek u iathuh ba la register case ia baroh kine ki jingjia bad ki jingtohkit kila iaid shakhmat ban lah pynithuh ia ki briew kiba donkti. U iathuh ba haduh mynta ym pat shym ka iohkem iano iano ruh.
U Bah Vivek u iathuh ba ki Pulit kila lum ia ki video CCTV halor kine ki jingjia bad ka jingpynithuh ia ki briew ba donkti kala iaid shakhmat.
Haba jubab ia ka jingkylli la ki don kino kino ki kyndon kiba donkti ha lyndet kane ka jingthombor, ula ong “Ia mynta ym pat don ba kam donkti ha lyndet kine ki jingjia hynrei ngin sa khmih ia baroh kine ki jingia hynrei ngin sa peit bniah ïa baroh kine ki jingjia, bad nga tharai ba baroh ki pyni shai ïa kaei kaba jia. Hynrei, ka jingthmu jong ka Puja ka dang long ka jingkylli.”
U la ong ba haduh mynta, la jia kumba 4 haduh 5 tylli ki jingjia kiba kum kine ha ka por jong ka Puja.
“Haduh mynta, la don kumba 4 haduh 5 tylli ki jingjia. Haduh mynta, ym pat don mano mano ba kam, hynrei ngim lah ban kdew ïa kano kano ka kynhun,” u la ong.
