Shillong, Risaw 21 : Ka Shillong Municipal Board kala khang ia baroh ki kam shong die jingdie madan harud ka surok GS Road, Motphran bad Iewmawlong, haba pynbna ia kane ka thain kum ka ‘No Vending Zone” ka ban treikam mardor.
Ha ka notice bala pynlong ha ka 16 tarik Risaw, u Chairperson ka Town Vending Committee bad CEP ka Shillong Municipal Board (SMB), ula bthah ia ki nongshong dukan madan kiba don ia ki Certificate of Vending, ba kin kynriah noh sha ki jaka die madan bala dep shna kyrpang ha lane shuwa ka 25 tarik Naiwieng, 2026.
Ka Board ka ong ba kane ka sienjam ka dei kaba pynbud ia ka jingleh survey kaba bniah ia ka jingdon ki nong shong dukan madan hapoh ka Meghalaya Street Vendors (Protection of Livelihood and Regulation of Street Vending) Scheme, 2023, kaba la pyndep ha u Kyllalyngkot 2024 bad ka jingmynjur ia ka thup ba khatduh jong ki nongshong dukan madan ba dei hok hadien ki jingiakam bad jingiapyrshah.
Haba kdew ia ka jingpynbna ka Sorkar Jylla ba 12 tarik Jymmang, 2026, ka SMB kala ong “Ka Sorkar Meghalaya halor ka jingai jingmut jong ka Town Vending Committee, kala pynbna ia ka jaka ieng kali ground floor ka Iewmawlong Parking Lot kum ka Vending Zone na ka bynta ka thain GS Road, Motphran bad Iew Mawlong.
Ka Board ka ong ba ki kam ban ai ia ki dukan bad ban pynbiang ia ki jingdonkam ba man ka sngi ha kine ki jaka shong dukan madan, ki dei kiba la dep pyndep lut.
Haba pynksan ia ka jingkhang shong dukan madan, ka notice kala ong “Ka shi lynter jong ka surok GS Road, Motphran bad Iew Mawlong la pynbna kum ka ‘No Vending Zone’ naduh mynta hi na ka bynta ka jingkylluid ban iaid ki kali bad ki paidbah”.
Haba maham ban pynshitom kat kum ka ain ia kiba ialehkai pyrshah kat kumka scheme 2023, ka SMB ka ong ba ki mar bala die ne buh ha kine ki jaka bala ithuh kum ki No Vending Zone hadien bala kut ka jingaipor, yn sa weng ia ki kat kum ki kyndon jong ka ain.
