Shillong, Risaw 21 : U Myntri Rangbah ka Jylla Conrad K. Sangma, ha ka sngi Balang u la ong ba ka rukom pyntreikam ka Sorkar ia ki kam pynroi ka long kaba kynthup lut ïa baroh bad kaba poi sha man ki kyndong kynshrot jong ka jylla, da kaba kynthup ïa ki jingtei ïa ki jingtei paidbah bad ka roi ka par ba shimet shimet.
“Ha u snem 2018, haba ka NPP ka la ïoh ïa ka jingkyrshan ban thaw ïa ka Sorkar, nga la ïathuh ha ki lad pathai khubor ba ka rukom pyntreikam jong nga ia ka roi ka par kan long kaba kynthup lut ïa baroh, kaba poi sha man ki kyndong kynshrot ka jylla, ha ki nongbah bad ki nongkyndong, bad ha baroh ki bynta jong ka imlang sahlang. Kan ym long tang ka jingtei ïa ki jingtei paidbah, hynrei kan kynthup ruh ïa ka roi ka par ba shimet shimet ban kyntiew ïa ka kamai kajih jong ki,” ong u Conrad haba ai jingkren ha ka jingïalang hadien ba plie paidbah ïa ka Synthetic Football Turf ha Mandalgitok Playground, Siju, bad buh ïa u mawnongrim na ka bynta ka building bathymmai ka Siju C&RD Block.
U la ai khublei ïa ki paidbah kiba la ai biang ïa ka jingshaniah ha ka Sorkar jong u na ka bynta ka samoi treikam kaba ar.
Haba pynpaw ba kane ka sngi ka long kaba dap da ka jingkmen bad kaba sah kynmaw, u Myntri Rangbah u la ong, “Ka long ka jingkmen kaba khraw bad ka sngi kaba sah kynmaw ban ïohi ïa ka madan phutbol artificial turf kaba don ha ka kyrdan jong ka pyrthei ha Siju.”
U la ong ba ka Jylla ka dang tei ïa 58 tylli ki madan phutbol artificial turf, kawei ha man la ki constituency, da ka jingmang pisa kaba palat T. 300 klur. Ynda la dep, Meghalaya kan long ka jylla kaba don bun tam ki madan artificial turf ha India.
“Ha kine ki phra snem ba la leit, la pynlut palat T. 2,000 klur ban kyntiew ïa ki jingtei jong ka kam ïalehkai, kynthup ïa ki stadium, ki madan phutbol, ki jaka jngi bad ki stadium hapoh ïing ha baroh 60 tylli ki constituency,” u la ong.
U Conrad u la ong ba ki samla bad ka kam ïalehkai ki long kiba kongsan bha na ka bynta ka lawei jong ka Meghalaya. “Lada ngi kwah ban pynlong ïa ka Meghalaya kawei na ki jylla kaba kiew shaphrang tam, ngi dei ban ai lad ïa ki samla jong ngi ryngkat bad ka pule puthi bad ki jingtei kiba donkam. Ka Meghalaya kan pynlong ïa ka National Games ha ka sien kaba nyngkong ha u bnai Lber 2027. Kumba 15,000 ngut ki nongïalehkai, ki coach bad ki ophisar kin wan ïashim bynta.
“Ka thong jong ka Sorkar ka long ba ki samla jong ngi na Siju kin ïoh khur takma ym tang ha ka National Games, hynrei kin mihkhmat ruh ïa ka Meghalaya bad ïa ka India ha ki Asian Games bad ki Olympic hadien habud,” u la ong.
Haba pynpaw ba ka roi ka par jong ki briew shimet ka long kaba kongsan ha ryngkat bad ki jingtei paidbah, u Myntri Rangbah u la ong ba ka instalment kaba nyngkong jong ka skhim FOCUS+, kaba kot T. 20–30 klur, la pyllait ha u bnai ba la dep sha 1.12 lak ngut ki nongïoh jingïarap.
U la ong ba ïa ka instalment kaba ar bad ïa ki instalment kiba sah yn pyllait ha u bnai Nohprah 2026. Ka jingpynrung kyrteng thymmai ka dang ïaid shakhmat, bad ïa ka pisa la phah beit beit sha ki bank account jong ki nongïoh jingïarap.
Haba kren halor ka Separate Electoral Roll jong ka GHADC, u Myntri Rangbah u la ong, “U Lat u la mynjur ïa ka Bill jong ka Separate Electoral Roll na ka bynta ka GHADC, kaba long ka sienjam kaba donkam bha ha ka histori. Mynta, ki briew kiba ym dei ki riewlum kim lah shuh ban thep vote ne ïakhun ïa ka elekshon jong ka GHADC.”
U la batai ba la thaw ïa ka GHADC hapoh ka Sixth Schedule jong ka Riti Synshar ka Ri India ban ïada ïa ka jinglong tynrai bad ki hok jong ki riewlum. U la ong ba kane ka jingdawa ka la slem bha ban urlong, hynrei mynta ka la urlong.
Haba kren halor ka Wangala Golden Jubilee, u Sangma u la ong ba ka jingrakhe ïa ka Golden Jubilee kaba 50 snem jong ka Wangala mynta u snem kan sakhi ïa ka jingtem lang haduh 1,000 tylli ki bom.
U la ong ba ka Sorkar ka la ai jingïarap pisa kaba T. 5.50 klur na ka bynta ka jingrakhe ïa ka 100 Drums Golden Jubilee, kaba kynthup ïa ka jingtei ïa ka Wangala arena, ki surok, ki jaka pynïeng kali bad kiwei ki jingdonkam ban pynlong ïa ka jingrakhe.
