Shillong, Naiwieng 09 : U Myntri Rangbah ka jylla Conrad K Sangma hynne ka sngi Balang, u la pynbna ba ka sorkar Jylla kala rai ban bahkhlieh (guarantor) haduh T. 4 klur ban airam sha ki briew ba don jingduna dkhot met lyngba ka National Handicap Finance Development Corporation.
Kat kum ka jingong jong u, kane ka jingbahkhlieh jong ka Sorkar ka long ban plie lynti ia ki briew ba duna ha ki dkhot met ba kin shim ram na ki Bank ha kaban sengkam lajong lyngba ki Livelihood Programme bapher bapher.
“Mynshuwa ka jingbahkhlieh ka long tang T. 1 klur hynrei ngi la rai ba na ka bynta ka bit ka biang jong ki Nongshongshnong kiba don jingduna ha ki dkhot met ba kin ioh lem ia ki jingiarap da ka jingshim ram, kumta ngi la rai ban kyntiew sha ka T. 4 klur” ula ong.
Ula ong ba kane ka T. 4 klur kan plie lad bad pynshlur iaki briew ba duna dkhot met ba kin sengkam bad ban ieng hala ki jong ki kjat.
Hynrei ula pynshai pat ba kane ka pisa ba T. 4 klur kam dei ka song pisa ban iarap iaki briew ba duna khot met hynrei kadei naka bynta ban pynshlur iaki ban shim ram daka bud iaki kyndon jong ki Bank ban sdang ka jingsengkam lajong namar ka sorkar kan bah khlieh ban iarap iaki.
