Nongstoiñ, Risaw 30: U Bah Bobby Kharshandi u bym shym la ïoh shuh ïa ka tiket na ka party Hills State People Democratic People Nongstoiñ, u la rai ryngkat ki nongkyrshan jong u ban ïakhun noh kum u Independent Candidate ne kyrtong shimet na Nongstoiñ Assembly Constituency.
Kane ka rai ka la mih ha ka jingïakynduhlang jong ki nongkyrshan jong u ha Nongstoiñ ha ka sngi saitjaiñ, ha kaba ka la don ka jingïa phylliew jingmut ban ïakhun noh kum u Independent Candidate namar ka jingbym ai ticket ka HSPDP.
Hadien ka jingïathir kaba la neh katto katne kynta, da kawei ka jingmut la rai ba thaw ïa ka Executive Committee jong ka kynhun bad la jied ruh ïa ki nongkitkam jong ka women wing bad youth wing ki ban sa pyntyllun ïa ka kam nangne shakhmat.
Ki nongkitkam ba hakhmat ka EC ki long Chairman Bah Kwik Lyngdoh, Vice Chairman Bah Samwell Marngar, Secretary D.F Wahlang, Assistant Secretary Markus Marweiñ bad Silvester Ryntong, Treasurer Cleverness Nongsiej bad ki Adviser ki long u Bah Tleding Wanniang bad Bah Donbok Thabah.
Hashwa ban jied ïa ki nongkitkam, la ïoh ïa ka jingkren na ki rangbah bad kumjuh ruh ki longkmie, kiba la pynpaw ïa ka jingdiaw mynsiem ha kaba ki nongkitkam ba hakhlieh ka HSPDP kim shym la sngap satia ïa ka jingkwah jong ki ban ai tiket ia u Bah Bobby. Ki la ong ba kane ka jingbym sngap ka dei ka jingleh shilliang jong ki nongïalam ka party.
Na ka liang u Bah Donbok Thabah u la pynpaw ba watla u Bah Bobby um ïoh tiket, hynrei kumba la rai lang da baroh ki nongkyrshan, kumta dei ban ïaid beit shakhmat ban ïaleh ïa ka elekshon. U la ong ba baroh hi kiba don ha ka jingïalang ki dei na ka HSPDP, hynrei mynta baroh kin kyrshan ïa u Bah Bobby ban pynliem ïa ka HSPDP.
U la ong ba lada ka HSPDP ka ïoh 5000 vote, u Bah Bobby u dei ban ïoh 7000 vote. Lada ka HSPDP ka ïoh 7000 ka kynhun u Bah Bobby ka dei ban ïoh 10000 vote. Ka jingïaleh hi u la ong kan long beit pyrshah ïa ka HSPDP bad lada u Bah Bobby un jop ïa ka thong kumba kwah ki nongkyrshan, baroh kin phai biang sha ka HSPDP hadien ka elekshon 2023. Ka daw u ong namar ka dei ka party kaba tang ma ka hi kaba don ïa ka nongrim ba skhem, ban shakri ïa ka dong ka thaiñ, ka ri bad jaidbynriew kumba la ïalam nongrim da u (L) Maieid Hoping Stone Lyngdoh.
Kum u kyrtong Independent ba la ïa mon lang da ki nongkyrshan jong u, u Bah Bobby Kharshandi haba kren sha ki nongthoh khubor u la ong, “Ngim shym la ïoh ïa ka tiket na ka party HSPDP, hynrei nga don ka jingkitkhlieh na ka bynta ki paidbah ka thaiñ Nongstoiñ. Namar haba nga rung ha kine ki thaiñ jong ngi naduh u snem 2019, nga ïohi ïa ka jingdonkam kiba bun”.
“Nga dei na ka ïing ka sem kaba la shakri ïa kane ka thaiñ mynta lah 20 tylli ki snem bad ka jingthrang jong nga, ka long ban rat diengkhong ïa ka jingduk. Ka jingduk kam dei tang jong ka kpoh, hynrei naduh ka met bad ka mynsiem, ka jingkoit jingkhiah bad ha baroh ki liang”, u la ong.
