Shillong, Risaw 30 : Ka District Magistrate ka East Khasi Hills, kala phah ia ka show cause notice sha ki arngut ki Nongialam ka seng Federation of Khasi Jaintia & Garo People (FKJGP) bad aipor ba kin ai jingpynshai/jubab hapoh ka 1 tarik u Naiwieng.
Ia kane ka show cause notice bala soi hi da ka District Magistrate, la phah myn ha ka 28 tarik Risaw sha u General Secretary ka seng Bah Eldie Newton Lyngdoh bad sha u Senior Vice President Bah Elton Cliff Warjri, namar ka huri hura kaba mih na ka jingiaid rally ha nongbah Shillong halor ka jingkyrduh kam ki samla.
Kine ki arngut ki Nongialam ka FKJGP ki dei kiba pan jingbit ban pynlong ia ka Rally bad ia ka jaka ban pynlong ia ka jingialang paidbah.
Kat kum ka show cause, la ong ba ka Ophis ka District Magistrate kala ai ia ka jingbit myn ha ka 25 tarik Risaw ban pynlong ia kane ka rally ha Shillong ha ryngkat ki kyndon kiba pyrrkhing. La ong ba u Bah Eldie bad Bah Elton kila aiti ruh ia ka shithi ba mynjur ban bud ia ki kyndon bala buh da ki bor District.
Hynrei la ong ba ha ka rally ba long ha ka 28 tarik Risaw, ki nongiashimbynta kila pynmih ia ka huri hura da kaba jrongkti ia ki nongleit nongwan bad pynjulor ruh ia ki katto katne ki kali ha ki thain Police Bazaar, Malki bad Dhankheti ha kaba katto katne ngut ki briew kila mynsaw bad la hap pynkit sha ki hospital ba marjan ban ioh jingsumar.
Ka District Magistrate kala ong ba ia ki kyndon bala buh da ki bor District la pynkhein da ki nongiashim bynta ha kane ka rally kaba long ruh pyrshah ia ka Undertaking bala ai da u Bah Eldie N Lyngdoh.
Halor kane, ka District Magistrate kala hukum ban ai jingpynshai ba balei ym dei ban pynngat ha ki kyndon ain pyrshah ia kine ki nongialam ka FKJGP namar ka jingpynkhein ia ki kyndon bala buh da ki bor District.
Ka District Magistrate kala aipor ia kine ki nongialam ka FKJGP ban phah ia ki jubab/jingpynshai hapoh ka 1 tarik u Naiwieng lem kumta, ka Ophis kan shim ia ka lynti jong ka ain pyrshah ia ki.
