Shillong, Risaw 30: U General Secretary ka seng United Democratic Party (UDP) Shillong City u Bah Allantry Franklin Dkhar, u la phah daka shithi sha u Myntri Rangbah ka jylla u Conrad K Sangma ba ai jingmut iaka sorkar ba kan shim ia ki sienjam kumno ban pynduna iaka jingdheng kali ha nongbah Shillong.
U Bah Allantry ula pynpaw ba ka jingnang jur ka jingdheng kali ha kylleng ka nongbah Shillong kala kylla long kum u maw jingthud ia ki nongshong shnong haka nongbah ha kaba bun ka por kala shu lehnohei haba ki mih na ïing ban leit sha ki jaka trei ne haba ki mih naka jaka trei ban wanphai shala ïing.
U la ai jingmut ba lada pyntreikam iaka rukom pyniaid kali kumba la leh ha Aizawl jong ka jylla Mizoram, khlem artatien ka sorkar kan lah ban weng ia ka jingeh kaba mad mynta naka jingdheng kali ha Shillong.
U Nongialam ka UDP u la ai nuksa, ba tang ki kali shimet kiba kut ia ki number 0 bad 1 ki lah ban iaid haka Lah Sngi u Blei, katba ki number kiba kut ha u 2 bad 3 kin ioh iaid ha ka Sngi Hatmajai, katba ha ka sngi Balang kin iaid ki kali kiba kut ha u number 4 bad 5 bad ha ka sngi Palei kin iaid tang kiba kut ha u 6 bad 7 bad ha ka sngi Thohdieng kin iaid tang kiba kut ha u 8 bad 9 katba ha ki sngi kut jong ka Taiew yn shah ia baroh ban iaid.
Ula ong, donkam pat ban pynbiang ia ki kali ban kit ia u paidbah ban pyndap pynbiang iaka jingdawa kaba lah ban mih na katei ka jingpynbeit iaka rukom iaid ki kali bad ka long kaba kongsan ban pyntreikam pura ia ki jingpyrkhing ha ka rukom pyniaid ia ki kali.
