Guwahati, Nailur 04: Ka liang pyrshah JD (U) ha Manipur kala pynbna ba ka party kan leit ujor sha ka iingbishar High Court pyrshah ia ka jingleit pyniasoh jong ki 5 ngut ki MLA jong ka sha ka seng BJP.
Ka JD (U) kala ong ba kane ka jingleit pyniasoh jong kine ki san ngut ki nongmihkhmat sha ka BJP ka dei ka jingpynkhein ia ki kyndon jong ka 10th schedule jong ki riti synshar ri ne Constitution.
Haba pynpaw halor kane ka jinglong jingman, u president ka JD (U) ha Manipur, u Kshetrimayum Biren ula ong namar ka dei ka jingpynkhein ia ki kyndon jong ka 10th schedule, kumta ruh na ka liang ka party kan leit sha ka iingbishar High Court ban kyntu ban pynkut noh ia ka jinglong dkhot jong kine ki san ngut ki MLA.
U Mohammad Abdul Nasir ula kylla long u MLA ba marwei ka JD (U) MLA hapoh ka party.Une ruh ula her sha Delhi bad u lah ruh ban pynpaw shen halor ka nongrim ka jong u.
Ha kawei pat ka bynta, u president ka BJP ha Manipur, u A. Sharda ula mih na Imphal ha ryngkat ki san ngut ki MLA barim ka JD(U) ban leit sha Delhi hynnin ka sngi Saitjain, ha kaba u president ka BJP, u J.P. Nadda bad katto katne kiwei pat la khmih lynti ba kin ai ia ka jingpdiang sngewbha.
Kine ki san ngut ki MLA ka JD(U) kiba la leit ban pyniasoh bad ka seng BJP ki kynthup ia u Khumukcham Joykishan, Ngursanglor Sanata, Ashab Uddin, Thangjam Arunkumar bad u L.M. Khoute.
Ka jingpynbna da ka Manipur Legislative Assembly Secretariat la ong ba ia kane ka jingleit pyniasoh la leh hapoh ki kyndon jong ka 10th schedule jong ka constitution.
