Shillong, Nailur 04: Ka sorkar jylla ka la rai ban phah tohkit mardor halor ka jingphriang ki khubor ba ka don ka jingbret pathar ia ki khun sniang ba la iap ha lynti NEGRIHMS hynin ka sngi.
“Ngan sa bthah ia i Director ka tnad ban phah tohkit mardor halor kane ka jingjia khnang ban lap ia ki jingshisha baroh,” ong u Symbud Myntri Rangbah Bah Prestone Tynsong haba kren bad ki lad pathai khubor.
Haba jubab halor ka jingkylli u la ong ruh katba kim pat dep ia ka jingwad bniah kin ym pat lah ban ong la kitei ki sniang ba la shah kynnoh bret pathar ki dei ne em ki sniang ba la sam da ka tnad Ri Jingri jongka sorkar dang shen ha Tynring.
“Lada kidei ki sniang ba sam da ka tnad Animal Husbandary & Veterinary kitei ki khun sniang kin don ia ki jingpyndeng ha ki shkor kiba ym lah satia ban law bad ki da don ruh bad ki number. Kumta lyngba kitei ki jingtah nombor yn sa lah ban tip ki dei ki sniang jongno.”
U Symbud Myntri Rangbah u ong ruh ba ha ka sngi ba ki sam ia kitei ki khun sniang ha Mawryngkneng consittuency ha ka jingialang kaba long ha Tynring ki la dep ban pynbna ba lada iap hapoh shibnai na kitei ba ki sam, ki paidbah kin sa ioh da iwei pat lada ki pyntip sha ka ophis.
Kumta, u la ong ba haba iadei bad kitei kiba iap pat un ym pat lah la kin dei ne em kiba da don bad kitei ki jingtah number bad lada ki dei ruh kan ym shem jingeh ia ka tnad ban lap ia ki trai jong kitei ki khun sniang.
