Ba dawa siew bai jaka haduh T. 45 lak ha ka SCB
Shillong, Nailar 11: U Myntri ka tnad Pule Puthi ka sorkar jylla, Bah Lahkmen Rymbui ha ka sngi Balang u la ong ba ka sorkar jylla kan pyntikna ba ka Lady Keane College kaba dei kawei na ki college ba pawnam ha ka jylla kan ioh ban bteng ia ka jingshakri khlem ka jingshah pynbor hangno hangno ruh.
Kane ka jingkren jong u kadei hadien ba katei ka College ka la shah phah siew haduh 45 lak tyngka kum ka property tax da ka Shillong Cantonment Board da kaba ong ba ka hap ha ka jaka jong ki shipai.
Na ka liang u Myntri u la iathuh ruh ba ha kine ki ar sngi lai sngi ki bor pyniaid jong katei ka college kin sa shongpyrkhat bad shim ia ki sienjam kiba iadei bad katei ka kam.
“Ka sorkar jylla ka donkam ban pyrshang lut ban pyntikna ba ka Lady Keane College kan ioh ban trei beit khlem ka jingpynbor hangno hangno ruh,” u la ong da kaba bynrap ruh ba tad haduh mynta na ka liang ki bor pyniaid jongka College kim pat pyntip satia sha ka sorkar jylla hynrei ma u hi dalade u la kren iakane bad ka Principal.
