Shillong, Nohprah 10: U Myntri Rangbah duh ka ri u Narendra Modi un plie ia ka ‘Viksit Bharat @2047: Voice of Youth’ ha ka 11 tarik Nohprah, 2023 ha ka por 10:30 mynstep lyngba ka video conferencing.
U Myntri Rangbah duh un ai jingkren ruh sha ki Vice Chancellor jong ki Skulbah, ki heh duh jong ki jaka pule bad ki nonghikai ha ki workshop ban pynlong ha ki Raj Bhawan ha kylleng ka ri, ka ban long ka dak jong ka jingsdang kane ka sienjam.
Ha jylla Meghalaya, yn pyni live ia ka prokram ha Durbah Hall jong ka Raj Bhavan, Shillong bad hadien kane kan don ruh ka workshop halor ka Viksit Bharat @ 2047 ha kaba yn iashim bynta da u Lat ka jylla Meghalaya, u Phagu Chauhan, u Myntri Rangbah ka Meghalaya u Conrad K Sangma, ki Vice Chancellor jong ki Skulbah bad ki heh duh jong ki College, ki ophisar ka Sorkar Jylla, ki samla pule na ki skulbah bad ki college bapher
Ka jingangnud jong u Myntri Rangbah duh ka long ban ai bynta ia ki samla jong ka ri ha ka jingwanrah ia ki jingpynkhreh kam jong ka ri, ki jingphaikhmat kyrpang bad ki thong jong ka ri. Ha kaba iadei bad kane ka jingangnud, ka sienjam ‘Viksit Bharat @2047: Voice of Youth’kan long ka rynsan ia ki samla jong ka ri ban noh synniang da ki jingmut jingpyrkhat jongki na ka bynta ka Viksit Bharat @2047.
Ka workshop kan long ka sienjam ba kongsan sha ka jingsdang ia ka kam ban kynthup ia ki samla ban iasam ia ki jingmut na ka bynta ka Viksit Bharat @2047 bad ka thong jong ka prokram ka long ban pynlong ia ka India ka ri kaba la kiew hashuwa u snem 2047, ka jingdap 100 snem ka jingioh jinglaitluid ka ri.
Ka thong ka kynthup ia ki bynta bapher bapher jong ka roi ka par, ka jingkiew ka ioh ka kot, ka jingkiew ka imlang sahlang, ka mariang kaba iaineh bad ka synshar khaddar kaba bha bad kiwei kiwei.
