Shillong, Nailur 19 : Ka kynhun ialehkai badminton ka Meghalaya, ki la iaksaid bad iakhun tyngeh bha hynrei kaba kut ym shim la don satia wat iwei napdeng jong ki ban bteng ban jam shakhmat ha ka lympung ialehkai ka North East Zone Inter-State Badminton Championship 2026 , ba la long ha JN Indoor Stadium mynta ka sngi.
Kane ka lympung ialehkai, ka ba la jam sha ka sngi kaba lai mynta ka sngi, la pynlong da ka Meghalaya State Badminton Association da ka jingkyrshan ka Directorate of Sports and Youth Affairs. La pyniaid ia ka da ka Badminton Association of India.
Haba phai sha ki jingiakhun, ka Elsarica Umdor ka la long ka nongialehkai ba nyngkong ban rung madan ban iakhun ia ka semifinal ha shwa ba kan shah pynliem noh ha ka Avikaa Borgohain ka Assam da 15-7, 15-10 ha ka jingiakhun ba para marwei ki kynthei.
Hadien kane, ha ka kyrdan iakhun ka U-19 ki khynnah kynthei, ka Netania T Tariang ka la liem noh ha ka Noimikha Saikia ka Assam da 15-3, 15-8.
Hadien kane ka Netania ka la don bynta ba kan iakhun sa ha kawei pat ka semifinal kaba dei naka bynta ka U-19 Mixed Team ryngkat bad u Gavin Kharbuki., ha kaba kine ki shi jur ki nongialehkai ka jylla kila shah liem noh ha Vanlalpekhlua bad Lalrinhlui Hmar ka Mizoram da 15-10, 15-10.
Ka jingiakhun ba khatduh ba shi jur ka jylla ka dei Gitchiak Bregim A Sangma bad Sonnal Joshi, kaba hangne hi ka jingiakhun khyndiat ka la lam itynnad bad kham iakhaid bha, bad ha kaba kut ki shi jur ki nongialehkai ka Meghalaya kila liem noh da 15-10, 15-6 ha M Hemam bad P Konjengbam da 15-10, 15-6 ka Manipur.
Ia ka pyrda jong kane ka lympung ialehkai yn pynhap noh lashai ka sngi Saitjain da ka Director General of Police ka jylla kong Idashisha Nongrang IPS kum ka kongsan.
