Guwahati, Naiwieng 12 :Khnang ban weng ia baroh ki jingartatien kiba dang sah ha kaba iadei bad ki jingiap kiba kham pher (unnatural deaths) ha ka jylla, baroh ki Superintendents of Police jong ki district bapher bapher ka Assam kila shah hukum na ka bynta ban khyllie biang ia baroh ki case kiba iadei bad ki jingiap kiba kham pher bad ban pynlong ia ka jingtohkit.
U Myntri Rangbah (CM) ka Assam u Himanta Biswa Sarma ula pynpaw ia kane haba kren sha ki lad pathai khubor hapoh ka conference room jong u ha Janata Bhawan hynnin ka sngi Thohdieng.
Da kaba phaikhmat halor ka jingtohkit ba dang shen jong ka tnat CID halor ka jingjia shah leh beijot bad shah pyniap jong kawei ka khynnah ha Dhula hapoh Darrang district ka Assam, u CM Sarma ula pynshai ruh halor kumno ba ka kynhun tohkit na ka Special Investigation Team kala pynlong biang ia ka jingtohkit halor kane ka jingjia baroh.
Hashwa jong kane ka jingtohkit ba la pynlong da ki bor pulit la shim ia kane ka jingjia kum ka jingpynkut hi iala ka jingim.
Nalor kata u CM ka Assam ula ong shuh shuh ba lyngba ki jinglap jingshem jong ka tnat CID’s Special Investigation Team, kumta ruh na ka liang ka sorkar ka don ia ka jingangnud ban ai ia ka khubor kaba khlain na ka bynta kito kiba don ha ka tnat pulit, ka tnat iingbishar bad ka tnat ka koit ka khiah na ka bynta ban trei hok bad ban bud beit ryntih katkum ka ain.
U CM Sarma ula kdew ruh halor ka jingiapher ha kaba iadei bad ka jingkhein ba la ai pynbna da ka National Crime Records Bureau (NCRB) halor ki case kiba iadei bad ki jingiap kiba kham pher.
“Kan long kaba shem shitom ban shaniah tylli ha ka jingkhein ba la ai da ka NCRB namar ba kin don ki case kiba iadei bad ki jingiap kiba kham pher kiba la jia lyngba ki jingshlei um ruh kumjuh, watla katta Nga la kyntu ia ki SP ba kin khyllie biang ia baroh ki case ia kiba la kam ba ki dei ki kam pyniap hi ia lade bad kiba la jia ha ki jaka kiba don ka jingartatien,” ong u CM ka Assam.
Ha ka jingpynkhreh ban pynlong ia ka jingtohkit halor kiba kum kine ki jingiap kiba kham pher hadien habud, na ka liang u CM ula ong ba na ka laing DIG bad SP jong kito ki jaka ba dei khmih kin pynlong ka jingleit jurip sha kito ki jaka da lade hi.Tad hadien ba kila sngewhun ia ka jingtohkit, kumta ruh ia kiba kum kine ki jait case jong ka jingiap ba kham pher lah ban khylliap ne pynkut noh.
Shuh shuh u CM Sarma ula ong; “Kino kino ki case ia kiba la kam ba ki dei kiba la pyniap hi ia lade lane kino kino ki case aksiden ne shah pyniap ia kiba la pynwan ha ka rukom jong ka jingpyniap dei dei ia kaban pynlong biang ka jingleit jurip.”
