Shillong, Risaw 09 : Ka BJP kala phaikhmat ban nang pyniar bad pynkhlain ia ka jylli treikam ha Meghalaya hadien ka jing wan iasoh ki 8 ngut ki MLA ka United Democratic Party (UDP).
U Heh BJP ba khmih ia ka Meghalaya Kanad Purkayastha, uba dang wan ha ka sien ba nyngkong hadien ba shimti ban khmih ia ka Jylla, ula lum ia ka jingialang hapoh Iing bad ki 8 ngut ki MLA ba dang iasoh thymmai ha Shillong hynne ka sngi Thohdieng ha ka jingiadonlang u President ka BJP Meghalaya Rikman G Momin, u Myntri Sorkar bad Parliamentary Party Lead Bah Sanbor Shullai bad u MLA ka Pynthorumkhrah Bah AL Hek.
“Kane ka dei ka sien ba nyngkong ba ngi wan hadien ba shimti ban khmih ia ka party ha Jylla. Ngi la iashong jingialang bad ki MLA ba dang shu iasoh thymmai. Ka mat ba kongsan ha ka jingiakren ka long kumno ban pyniar bad pynkhlain ia ka party ha Meghalaya” ong u Purkayastha haba iakren bad ki nongthoh khubor.
“La bynshet ha ngi ia ka kamram ban pynkhlain ia ka party ha Meghalaya bad kane ka dei ka jingpynleit jingmut jong ngi” ula ong.
Une u Heh BJP ula ong ba ka party ka kwah ban rah ia ki mat pynroi u Myntri Rangbah Duh ka Ri Narendra Modi sha baroh ki breiw ha ka Jylla.
“Ngi kwah ban poi sha baroh ki briew ha Meghalaya bad iathuh ha ki shaphang ki kam pynroi bala leh hapoh ka jingia lam u Narendra Modi. Lada man ki Jylla ki ioh ia kane ka kabu, ka Meghalaya ruh ka dei ban ioh” ula ong.
Halor kiwei pat ki kam sain pyrthei, u Purkayastha ula ong “Nalor ki kam party, ngim kwah ban pynleit jingmut halor kiwei pat ki kam sain pyrthei ia mynta. Hadien katto katne sngi, ngin sa iakhmih ia kita bad sa pyntip sha phi”.
