Hashuwa ban pynkylla thymmai ia ki kyndon ka Khyrnit ba hynriew
Shillong, Naitung 07: Ka Khasi Hills Autonomous District Council (KHADC) kala rai ban sa khot ia ka jingialang bad ki Khlieh Nongsynshar ban iathir iatai halor ki soskular bala iasoi hapdeng ka Sorkar India bad ki Khasi State hashuwa jong ka jingpynkylla thymmai ia ka Khyrnit ba hynriew jong ka Riti Synshar ka Ri.
Ia kane la pyntip da u Chief Executive Member (CEM) ka KHADC bah Titosstarwell Chyne hynne ka sngi palei haba jubab ia ka Motion bala wanrah da u Nongialam ka Liang Pyrshah Bah Pynshngain N Syiem, halor ka jingdonkam ban iakren ia ka histori jong ka Ri Khasi hashuwa ka jingwan jong ka Sixth Schedule.
U Bah Titos ula ong ba ka Motion ka dei ka jingkyrsiew thiah ia ka Council namar ka jingnang duh bor na ka sngi sha ka sngi. U la mynjur ruh ia ka jingdonkam ban shong bishar biang ia ka Instrument of Accession (IOA) bad ka Annexed Agreement (AA) ba la iasoi hapdeng ki Khasi Sates bad ka Sorkar India.
“Namar kata, ka EC shen kan sa khot ia ka jingialang bad ki Khlieh Nongsynshar halor kane ka kam katba kam pat don ka jingpynkylla thymmai ia ki kyndon jong ka khyrnit ba hynriew ka riti synshar ka Ri, Nga sngew ba ngi dei ban wanrah da ka Resolution ban pynkhlain ia kine ki soskular” ong u Bah Titos.
Une u Khliehduh ka KHADC ula ong b aka Council kala dep mynjur ia ka Land Bill ban ithuh noh ia ki kot ki sla kiba la ai da ki Khlieh Nongsynshar kat kum ka ain.
Haba wanrah ia ka motion, u Bah Pynshngain ul a ban jur ia ka jingdonkam ban pynrung ia ka jingthmu jong ka Annexed Agreement ha ka khyrnit ba hynriew khnang ban pynthikna ba ki ain jong ka Parliament kin nym treikam ha ki jaka bad ka hok jong ki paid riewlum ka Jylla.
U Bah Pynshngain ula ong ba ka Annexed Agreement kala ong ruh ba ym dei ban ai bor palat ha u Lat ka Jylla hynrei ha ka khyrnit kaba hynriew la pynkup bun ka bor ha u bad dei namar kane lyngba ka notification kong u snem 1951, u Lat barim ula rah ia ka Block I bad Block II sha Mikir Hills.
