Shillong, Nailar 28 : Ka Sorkar Jylla kala nang wad ban pynthikna la ki don ne em ki nongshongshnong ka Jylla kiba sahkut ha Nepal namar ka jingshlei um, ong u Symbud Myntri Rangbah khmih ia ki kam Pohiing, Bah Prestone Tynsong ha ka sngi Thohdieng.
Ym pat don satia kano kano ka case bala pyntip sha ngi kat haduh mynta, ula ong haba pynpaw ia ka jingsngewlem ia ki lanot kiba iap ha ka jingshlei um ha Nepal.
“Ka long kaba sngewsih jur. Nga phah ia ka jingsngewlem sha baroh ka Nepal” ulaong.
Haba kylli la ki don ki nong Meghalaya kiba ngat ha kane ka jingjia, u Bah Prestone ula ong “Ngim pat ioh satia ia kano kano ka jingtip. Nga la dep bthah ia u Chief Secretary bad ka DGP ban wad la ki don ne em ki nongshongshnong ka Meghalaya kiba ngat. Haduh mynta, ngim pat ioh jingtip”.
Haba pynpaw ba ka Jylla ka long kaba la pynkhreh ban tehlakam ia kano kano ka jingjia ba kyrkieh, ula ong ba ka Meghalaya ka la pynkhreh pura ia kino kino ki jingjia, lada dei kiba jia hapoh ka Jylla lane sha kano kano ka jaka hapoh ka Ri.
Halor ka jinglang bad shlei um ha Jorabat ha ka por slap, u Bah Prestone ula ong ba kane ka bynta ba shlei um ka hap hapoh ka jingkhmih ka NHAI bad kam dei satia jong ka Tnad PWD ka Jylla.
U ong ba dei ka jingbahkhlieh ka NHAI ban sumar bad shna ia ka surok bad kala dei ban pynlong ia ka sorjamin kaba bniah ia ka kyrdan jong ka surok hashuwa ban pyntrei ia ka kam.
“Nga la shong jingialang bad ki heh ka NHAI bad bthah ia ki ba kin pynlong biang ia ka sorjamin kaba bniah bad ban leh ia kaba donkam, namar wat haba slap rit ruh, ka surok ka lang bad shlei um” ula ong.
