Nongpoh, Risaw 13: Ka Office treikam jong u District Sport Officer, Ri-Bhoi District ha ka jingiatreilang bad ka District Administration, Ri-Bhoi District, Nongpoh kan pynlong ia ka jingiamareh halor ka “Fit India Freedom Run 3.0 – Azadi ka Amrit Mahotsav, 2022” naka bynta ki Kynthei bad Shynrang kiba 14 snem shaneng ka rta.
Kane ka jingiakop mareh, kaban sdang na Jyntru bad kut ha NSCA, Indoor Hall, Umlyngkdait, Nongpoh, kan long ha ka 20th Risaw, 2022 ha ka por 6 mynstep.
U District Sports Officer, Ri-Bhoi District, Nongpoh U khot sngewbha ia baroh ki nongiamareh na Ri-Bhoi ban ia shim bynta ha kane ka jingiamareh. Kiba kwah ban ia shim bynta ha kane ka jingiakop kin hap ban leit ai kyrteng ha office U District Sports Officer, Ri-Bhoi District, Nongpoh ha kaba ka tarik ba khatduh ban register kan dei ha lane shwa ka 19th Risaw, 2022.
Kane ka long ruh ka jingpyntip ia baroh ki nongiashim bynta ha ka jingiamareh ba ki dei ban long kiba 14 snem shaneng ka rta bad ba kiba koit ba khlain ruh, ha kaba na ka liang ka office kan ym shim iaka jingkitkhlieh lada don kino kino kiba khie pang hapdeng ka jingmareh naka daw ki jingpang ba la don lypa.
Na ka liang ka ophis ka la pynbna, ba ki nongjop ha kane ka jingiakop mareh kin ioh ban khur ia ka song pisa kaba kynthup naduh ka 1st Prize kin ioh 7,000/-, 2nd Prize 5,000/ bad 3rd Prize kin ioh 3,000/-, bad kumjuh ruh na ka bynta ki nongiamareh ba rangbah tam Shynrang bad Khynthei.
