SHILLONG, Risaw 13: Lada phi skhem iala ka nongrim bad lada phi khlem ibein iala ki jong ki MLA ne MDC, kano kano ka party kan ioh iala u soh ba thiang.
Ia kane la ong da ka kong Amapareen Lyngdoh ka MLA bala shah sospon naka sengsain pyrthei Congress haba kylli hato ka Congress ka lah ne em ban wanphai biang haka bor hadien ka ilekshon 2023.
Haba kren sha ki lad pathai khubor ka kong Ampareen kala ong ba ym lah ban tip iaka ban jia la kadei naka bynta ka sengsain pyrthei Congress ne kino kino ki sengsain pyrthei hynrei haba iadei bad ka Congress kan long kaba eh ban jop bun tylli ki seat haka ilekshon 2023 namar party kala beh wat iaki MLA kiba dang don hapoh ka party.
Ka kong Ampareen kala kam ba ki ba kham pait dohnud ha ba iadei bad ka jingpra ka sengsain pyrthei Congress hapoh Meghalaya kidei ki 5 ngut ki ngut ki MLA kiba la shah sospon haka party.
“Kiba kham pait dohnud kadei hi ma ngi ki 5 ngut ki MLA kiba la shah sospon haka party namar ngi la long trai iaka party namar kumba iohi mynta ka sengsain pyrthei Congress ka lah dei jong no re jong no re bad kane kan ktah ym tang iaki MLA ne MDC hynrei wat iaki paidbah ka jylla bad ka ri baroh kawei” la ong ka kong Ampareen.
Ka kong Amapareen kala ong ba ka por kan sa batai iaki sngi, lano ki 5 ngut ki MLA kin pynbna iaki party thymmai namar kumba iohi mynta ka party kala dep ban ithuh iaki kyrtong kiba thmu ban ieng haki konstitwensi jong ki 5 ngut ki MLA ba la shah sospon.
Kala ong ba ka jinglong jingman jong ka sain hima hapoh ka Meghalaya mynta ka kynti ka long kaba itriem bad kaba ima bad kaba ym lah ban ithuh bad namar iaki MLA la jied daki paidbah ne ki nongkyrshan, ki MLA ruh ki donkam ban iasyllok bad ki paidbah hashuwa ban leit iasoh sha kano kano ka party.
“Ia ngi la jied daki paidbah ban long MLA naka seng Congress bad ngin iai neh haka Uniform jong ka Congress tad haduh da kut ka samoi treikam 2018-2022 bad ia kaei ka ban jia shakhmat ngin sa shim iaka rai hadien ka jingiasyllok bad ki paidbah kiba la jied iaki kum ki MLA” la ong ka kong Ampareen.
