Shillong, Nailar 31 : Ka kynhun ki nongshet bam ja sngi ha ki skul ba tip kum ka All Meghalaya Midday Meal Workers hynne ka sngi sngi Balang ka la shim ia ka rai ban sangeh noh ka jingiakhih hadien ba ka tnad pule puthi ka sorkar jylla ka la rai ban kyntiew noh ia ka bai trei jong ki ba ki ioh man u bnai.
Kane ka rai kala mih hadien ka jingialang bala khot da u Commissioner & Secretary ka Tnad Education u Dr BDR Tiwari ryngkat u Director ka Tnad Ambrose Marak ia ka seng ban iakren ia ki jingdawa ka seng.
U Nongaibuit ka AMMW Bah KL Pariat u la pyntip ba kine ki Ophisar ka tnad ki la pyni ruh ia ki jingtyrwa kaba ki la phah sha ka tnad Pla tyngka bad ruh sha ka Planning naduh ka 11tarik u Nailar.
“Ha katei ka jingtyrwa ka tnad Pule Puthi ka la bthah ia ka tnad Platyngka bad kumjuh ia ka Planning Department ban kyntiew noh ia ka jingsiew ba man u bnai sha ki nongshet jingbam sngi bad ruh ki nongiarap na ka 1000 shi bnai sha ka 2000 tyngka shibnai na ka bhah jong ka Jylla, ka ban treikam naduh u bnai Iaiong 2022 haduh u Naiwieng 2022 bad ruh na ka bynta u Rymphang 2023 haduh u Lber 2023,” ong u Bah Pariat.
La iathuh ruh ba katkum ka jingiakren bad ki heh sorkar jong ka tnad pule puthi la sngewthuh ba ka sorkar jylla ka la pynkhreh ban kyntiew noh ia katei ka jingsiew ba 2000 tyngka na ka bhah jong ka sorkar jylla tangba kan ym lah pat ban siew naduh u Nohprah bad Kyllalyngkot namar kam long katkum ka prokram jong ka PM Poshan Scheme.
U ong ruh ba hadien ba la mynjur ka kynhun Myntri ia katei ka jingtyrwa ki nongtrei bamja sngi kin sa ioh noh ia ka jingsiew kaba 2000 tyngka na ka bhah jong ka sorkar jylla bad 1000 tyngka na ka bhah jong ka sorkar bad ba ka sorkar jylla kan sa bishar bniah ia ka jingdawa ban siew noh ia ka jingsiew na ka bynta 12 bnai.
Halor ka jingdawa ia ki tyndong LPG ban pynkhreh bam na ka bynta ki khynnah skul u Bah Pariat u la ong ba ka sorkar jylla kan ym lah satia ban pynbiang da ki tyndong lyer shet namar kam dei katkum ki kyndon jong jong ka PM Poshan Scheme.
“Kumta ia mynta ngi la rai ban snageh shwa ia ki jingiakhih jong ngi bad ngin leit phai biang sha ki kam ki kam bad ngi la ai por ruh ia ka sorkar haduh ba kut jong u Naiwieng ban pyndep ia ki kam baroh,” ong u Bah Pariat.
