Shillong, Nailar 31 : U State President jong ka NPP Dr WR Kharlukhi u la ong ba bun ki la shu kynnoh khlem nongrim ia ka party ba ka jur ka jingbamsap hynrei kim nud pat ban mih shakhmat ban ujor.
“Nga ju ong barabor ba lada phi lap ba don shisha ka jingbamsap ki dei ban ujor beit da ka FIR ha ki pulit lane phi lah ban leit ujor beit beit sha ka Kashari,” u la ong ha ka sngi ba ki pynskhem ia ka NPP Shillong West kaba long ha kane ka sngi Baar.
Shuh shuh u ong ruh ba ki paidbah kim dei satia ban shu kynthoh katba lap da kaba iohsngew pateng na kiwei lane tang na ka Ktien lorni khlem da don ki sakhi sabut kiba biang ban pynshisha.
U tei u khlieh duh ka party NPP ha Meghalaya u ong ruh ba lada shu peit na ka jinglong jingman kaba iaid ha ka jylla mynta u don ka jingkyrmen ba ka NPP kan sa wan beit ha ka bor ha u 2023.
“Lada shu peit na ka jingwan ki nongialam ban pyniasoh sha ka party ka don ka jingkyrmen ba ka NPP kan sa wan biang ha ka bor bad ioh ruh ban synshar marwei,” bynrap biang u Dr. Kharlukhi.
Ia ka Shillong West mynta la khlieh da u Bah Rishan Rapsang hynmen jong u MLA ba shah sospon ha ka Congress u Bah Mohendro Rapsang kum u President.
