Guwahati, Nailar 31:Ka kynhun seng lehnoh kaba la shah khein beain, ka United Liberation Front of Asom-Independent (ULFA-I) kala pynbna ba sa uwei pat u dkhot jong ka ula shah rai pynrem da ka jingiap halor ka jingpyrshang ban phet krad napoh ka ktem jong ka seng hynne ka sngi Balang.
Ia une u dkhot bala rai pynrem da ka jingiap la tip kyrteng kum u Rihan Asom ia uba la tip ruh kum u Mohammad Saiful Islam.Une u dkhot la ong ba u dei u nongshong shnong jong kawei ka shnong hapoh Lakhimpur kaba hapoh Goalpara district ka Assam.
Kane ka dei ka sien kaba lai ha kaba kane ka seng kieng atiar kala pynthikna halor ka rai pyniap iala ki jong ki dkhot mynta ka snem.
Kham hashwa, ha u bnai Jymmang ba la dep, arngut kiwei pat ki dkhot jong ka seng kila shah pynbna da ka rai pyniap halor ki jingshah kynnoh kam syntiat ha kaba iadei bad ki rukom treikam jong ka seng na ka bynta ki bor pulit ka Assam.
Ia kine ki arngut ki dkhot bala shah pyniap la tip kyrteng kum u Dhanjit Das ba la tip kum u Roopak Asom bad u Sanjib Sarma bala tip kum u Rishav Asom.
U Dhanjit Das u dei na ka sor rit Barpeta ha ka thain shathie ka Assam, katba u Sanjib Sarma u dei u nongshong shnong jong ka shnong Baihata Chariali kaba hap hapoh Kamrup district ka Assam.
