Shillong, Naitung 21: Ki Nonghikai SSA kiba don hapoh ka lama jong ka Meghalaya SSA School Association (MSSASA), hynne ka janmiet sngi palei, kila rai ban weng noh ia ka jingiakhih ba khlem pud kaba la iaid haduh 4 sngi .
Ia kane la pynbna da u President ka MSSASA Bah Aristotle Rymbai hadien ka jingialang bad ki Nonghikai SSA kiba shong mungor hajan Additional Secretariat, kaba la jia ruh tang khyndiat por na ka jingiakynduh ia u Symbud Myntri Rangbah ka Jylla Bah Prestone Tynsong.
“Ki Nonghikai SSA kila rai ban pynsangeh noh shuwa ia ka jingiakhih namar ka Sorkar kala kular ban siew noh ia ka tulop kaba saw bnai hapoh ka 27 tarik Naitung” ong u Bah Aristotle, uba la bynrap ba ka Sorkar ka la ai da ka jingthoh halor kane ka jingkular.
Hynrei u Bah Aristotle ula ong ba lada ka Sorkar kam lah ban pynurlong ia kane ka jingkular “Ngim don lynti pat da kumwei lait noh tang ka jingpynbteng biang ia ka jingiakhih ba khlem pud”.
U Bah Aristotle ula ai khublei ruh ia ki kynhun Sengbhalang bad ki Nongshongshnong ka Jylla kiba la ai ia ka jingkyrshan ia ki nonghikai ha kine ki jingiakhih ba saw sngi lynter.
