Shillong, Naitung 21: Ka Langsning FC kala knieh biang ia ka kyrdan ba-ar ha ka OC Blue Shillong Premier Leaque 2021-2022 hadien ka jingiakhaid bad ka Ryntih SC da mar 1-1 kol ha ka jingiakhun ba long hynne ka sngi palei ha Madan Polo.
Da kane ka jingiakhaid, ka Langsning FC kala ioh 11 point ha ka miej khein point, kaba iakhaid bad ka Rangdajied United hynrei kane ka Champion ba arsien kala ioh lamkhmat da ka jinglah pynlien ia ka Rangdajied da 2-1 kol ha ka jingiakhun ba long ha ka 7 tarik Naitung.
Ka RUFC kala hiar sha ka kyrdan ba lai katba ka Ryntih kala sah ha ka kyrdan kaba 4.
U Rang ialehkai Dawanchwa Challam ula ioh pynkhih jar ia ka Ryntih ha ka minit ba 7 hashuwa ba u rang ialehkai Shano Tariang ula ioh pynphai kylla ha ka minit ba 24.
Nalor ka Langsning kaba la poi ia ka kyrdan ba ar, ka kynhun ba lamkhmat nyngkong eh ha ka miej iakhein point ka dei ka Mawlai kaba la tam haduh 5 point.
Ka jingiakhun jong ka kylla ka hynniew (round 7) kan sa sdang ha ka sngi saitjain da ka jingiakhun hapdeng ka Shillong Lajong FC kaba dei ka Champion bala lah bad kaba don mynta ha ka kyrdan ba 6 pyrshah ia ka Malki SC. Kine baroh ar kynhun ki la kamai mar 4 point hynrei ka Lajong kala tam da ka jingshah thep bun kol kaba long -6 bad -10.
