Shillong, Jylliew 15: U Air Officer Commanding-in-Chief (AOC-in-C) jongka Eastern Air Command, u Air Marshal DK Patnaik, hynne ka sngi Balang, u la ong ba ka Agnipath Scheme ne ka skhim pynrung kam shipai ia ki samla kadei ka jingiohnong ia ki samla kiba rung haka kam shipai, ka tnad shipai bad iaka ri hi baroh kawei.
Une u khliehduh jong ki shipai Liengsuin jongka EAC u la iathuh ba dang hynnin ka sngi ka sorkar pdeng kala pynbna ban pyntreikam noh iaka Agnipath Scheme ha kaba ki samla haka rta kaba 17.5 snem ka rta haduh 21 snem ka rta kin ioh ia kabu ksiar ban rung ha ka kam shipai, kata Air Force, Army bad Navy.
“Ka ju don ka jingong ba kan dei ka jingiohnong ia baroh ar liang hynrei ha kane ka Agnipath Scheme ka jingiohnong kan long ha ki lai bynta, kata ia ki samla kiba ioh rung haka kam shipai, ka tnad shipai bad ia ka ri India hi baroh kawei” ong u Air Marshal DK Patnaiak haba iakren bad ki nongthoh khubor.
U Air Marshal u la iathuh, ba ka jingpynrung kam shipai ia ki samla ha ka ri baroh kawei kan long hadien 90 sngi naduh ba ka sorkar pdeng kala pynmih iaka jingpynbna paidbah bad ula kyntu ia ki samla ba kiba kwah ban rung ha ka kam shipai ba kin ym pyn leh nohei ia kane ka kabu kaba ki ioh mynta.
U la iathuh ba lyngba katei ka scheme, ki samla kiban shah jied kum ki shipai ne kiban tip kum ki ‘Agniveer’ kin ioh ban rung bad trei ha ka kam shipai na ka bynta 4 snem bad mynta u snem yn pynrung kam haduh 46,000 ki samla bad hadien ka 4 snem yn jied 25% ia ki samla ba kin ioh bteng ban don haka kam shipai katba ia ki 75% yn sa pyllait noh ia ki ban leit trei noh da kiwei pat ki kam ki jam.
“Ki samla kiba shah jied kin hap ban leh ia ka training ne jingioh jinghikai kaba 6 bnai bad ban trei na ka bynta 3 snem 5 bnai bad kine ki Agniveer kin iohpdiang iaka tulop man la u bnai bad hadien ba kila pyndep iaka jingshakri kum ki shipai 4 snem, kin ioh ia ka pisa kaba kot T.11 Lak bad kan ym don kano kano ka jingot ia ka khajna na ki” ula ong.
Une u Heh shipai ula ong ba ka dawbah ba pynlong ia ka sorkar pdeng ban sdang ia kane ka scheme kadei namar ha ki snem kiba la leit namar ka jingsaphriang ka khlam COVID-19 ym shim la ioh ban pynrung kam shipai ia ki samla kumta kane ka Agnipath Scheme kan plie lad ia ki samla ban ioh rung ha ka kam shipai bad kumba long mynta ka ri ka phaikhmat bha ha ki samla kiba dang lung ka rta namar kidei kiba tip bad kiba nang bha ban pyndonkam ia ki kor ki bor jong kane ka juk stad kaba mynta.
