Ka jingsngew | Shah ksih ka Meghalaya na pdot | Ka roi ka par ne shu iai sah kumjuh – ka drama Lumpongdeng

– Kenny Jyrwa

Khyndiat eh ki mat ha kine ki taiew ba la dep, ki la pynmih ïa ka jingïakren kaba jur ha Meghalaya kumba long ka jingthmu jong ka Sorkar ban wanrah ia ka projek kam jngohkai pyrthei ha Umiam. Ka sorkar Jylla, ryngkat ka jingïatreilang bad ka Indian Hotels Company Limited (IHCL), ka thmu ban tei ïa ka Luxury 5 star Hotel ha Orchid Lake Resort. Ha pdeng jong kane, ka mih ka dewlynnong Lumpongdeng; ka dewlynnong kaba kynjah jar jar bad kaba itynnad bha, kaba la shu kylla long kynsan kynsan ka drama jong ka jingialeh hapdeng ka roi ka par bad ka jingpyrshah.

Ka jingshisha, la kumno kumno ruh kat kum ki kot ki sla, ki long kiba beit ba ryntih. Kane ka project ba thmu ban pyntrei kan long ha ka jaka ba don kumba 66 acre, ha kaba 36.10 acre ka hap hapoh ka dewlynnong Lumpongdeng bad 29.64 acre ha ka jaka ba ieng ka Orchid Lake Resort. Kaba kongsan ka long, ka jingtei ka Hotel 5-Star ka dei kaba thmu ban pynieng ha ka jaka ba don ka Orchid Lake Resort, ym ha ka dewlynnong, kat kum ka plan jong ka Sorkar.

Ka sorkar ka la pynpaw ruh ba yn shah tang ïa ki jingtei ki bym don jingma ia ka mariang, kiba shipor ne kiba dei kat kum ka aiom ha Lumpongdeng, da kaba pynneh bad burom ïa ki kyndon iada ia ka mariang.

Hynrei, kaei kaba la sdang kum ka jingsngewkhia ia ka mariang, kala pynkylla sted pynban sha ka kynrum kynram kaba heh. Ka kynhun ki samla ba pyrshah, kiba niew ialade kum ki nongsumar ban pynneh pynsah ia ka mariang, kila dawa ba dei ban pynduh pyndam syndon ia ka project baroh kawei. Ka jingiakhih jong ki, mynta kala nang heh lyngba ka jingia shong shah thngan ba khlem pud, kaba pyni ia ka jingbym shaniah kaba jur ia ki kam pynroi ba wanrah da ka Sorkar Jylla.

Hynrei, ka lynti iaid jong kane ka project kala pynmih ia bun ki jingkylli ki bym itynnad. Kaei kaba sdang kum ka jingiakren halor ka mariang kala paw mynta kumba la khleh ia ka sur kam sain pyrthei. Ka jingdonbynta (ba beit beit ne na lyndet) jong ka kynhun Liang Pyrshah kala pynkylla ia ka jingiakren na kawei ka jingpeit bniah sha ka jingkyntait pura ia ka. Ka jingkylla ka iathuh : na ki jingsngewkhia halor ka jingktah ia ka mariang sha ka jinghylla ban pynkhyllem ia ka Sorkar. Kane kam dei shuh tang ka kam halor ka dewlynnong Lumpongdeng.

Ban iashai, ki jingsngewkhia halor ka mariang ha ka jaka kaba lah ban shah pynjot suk kum ka Umiam kam dei satia ka kam kaba rit ne kaba lah ban shu kdat sharud. Ka dewlynnong Lumpongdeng, kaba lah ban poi tang da ki lieng bad kaba lah ban iohi ba ka long kaba kynjah, ka bym da bun ki nongjngohkai ban leit watla kila don lypa ia ki Iinglieng (boathouse) ba pyndait kor Solar ban sah ki briew, ka dei kaba dei hok ban hap pyrkhat bha. Kano kano ka kam pynroi ka dei kaba hap ban da thew, kaba shai bad kaba don jingkitkhlieh.

Hynrei ka jingpyrshah, ban long kaba don jingmut, dei ruh don lang ia ka jingkitkhlieh. Ban shu kyntait pura khlem ka jingiakren ka buh jingma bad pynlong kam kai iaki nongrim ne ki daw kaba ki hi ki ieng ban iada. Ka lynti “bym kwah iakren, bym kwah iapynbeit” kam dei ka jingpyrshah jong ka synshar paidbah hynrei ka dei ka jingpynthut. Lada ia kawei pa kawei ka projek la shu niew kum ka bym iahap ne ka bym pdiang, ka synshar khadar hi kan long kaba eh bha.

Kane ka rukom long kam dei shuh kaba thymmai. Ha jan man ki kam naduh ki surok, hospital, ki jingtei bad wat ki jingdonkam kum ki project jaka theh niut, kila mad ia ka jingieng pyrshah kaba iaid shabar jong ka jingpeit bniah. Kaei kaba mih ka long ka jingsngewthuh ba ka roi ka par ha Meghalaya ka sahkut beit, ym man ka por namar ka jingbym biang ki polisi, hynrei namar ka jingbym lah ban wanrah ia ka jingmynjur lang.

Ka don ruh ka jingshisha halor ka ioh ka kot ka bym lah ban shu phai lyndet. Ka jingeh kaba ka Meghalaya ka iakynduh ka long ka jingduna ki karkhana, ka jingnang kiew ka jingbym iohkam iohjam bad ka jingshaniah tylli tyllan h ki kam Sorkar. Ka kam jngohkai ka dang dei kawei na ki khyndiat eh ki kam kaba don ka jinglah ban wanrah ia ka jingroi kaba nang kiew. Hynrei ka kam jngohkai kan nym kiew satia tang na ka jingitynnad ka mariang, ka donkam ia ki jingtei, ka jingkynrhsew pisa bad ka jingshakri.

Ka jingkhanglad ia kum kine ki jingkynshew kan wanrah ia ka jingduhnong kaba khraw. Nalor ka jingioh aikam aijam ha ka jingpdiang, jingpynbyrngia bad jingpynbiang ia ki jingdonkam ki nongwan kai (hodpitality), ki project kiba kum kum kane (Taj Resort & Spa) kin don ka jingktah kaba bun. Balei ban shu phai lyndet ia ka jingmyntoi jong ki nongniah kali, ki tour guides, ki nongdie dukan bad kiwei kiwei. Na ka bynta ka jingkylla kaba ka lad iohkam iohjam ka duna bha, kine kim dei ki jingmyntoi kiba rit.

Ka long ruh kaba donkam ban kren shaphang ki jingkren bein kiba la mih hapdeng ki jingiakhih. Ki jingpyrshang ban pynjah burom ia ki kam hapoh ka tnat pdiang sngewbha bad ka jingkoit jingkhiah, kynthup ia ki nongtrei Spa bad ki nongkhem kiba la shah hikai pyntbit, ki pyni ia ka jingpyrshang ban ialam bakla ia kiei kiei baroh, kaba pynkhuslai jur bha. Kum kine ki jingkren kim da ioh eh ia ka jingkyrshan u paidbah, hynrei, ki buh jingma ruh ban shah niew bein ia kito ki briew kiba shaniah ia ka kamai jakpoh na kine ki kam.

Kaba kongsan eh hangne ka long, kane ka kam kam dei shuh tang ia kawei ka project, kala nang pynmih shuh shuh ia ki jingkylli kiba hap ban iapuson : Hato ka Meghalaya kan lah mo ban pyntrei ia ki kam pynroi kaba iaid beit iaid ryntih bad ba don jingkitkhlieh haba iada ruh ia ka mariang lane kan shu sahkut hajuh ha ki jingsuba sniew?.

Ka Sorkar, na ka liang jong ka, kala ieng skhem ha ka nongrim ba ka long kaba kloi ban iakren, haba pynpaw biang b aka project kan bud ryntih ia ki kyndon iada ia ka mariang, kiba duna ka jingktah. Kane ka jinglong ba kloi ban iakren dei ban pyniahap da ka jinglong ba kloi ruh na ki nongpyrshah ym ban shu pynksan iala ka nongrim.

Ka Meghalaya mynta ka don ha ka khep kaba donkam bha. Kawei ka lynti kan lam sha ka jingroi kaba la pynbeit ryntih ha kaba ka jingkynshew pisa, ka jingiada ia ka mariang bad ka jingkitkhlieh ka iaid ryngkat ryngkat. Kawei pat ka lam sha ka jingpyrshah kaba ktah ia baroh, ha kaba ki project ki shu sahkut hashuwa ba kin sdang, bad ki kabu ki lad ki kabu ki shu iaid lait.

Ka don, ha ka jingshisha, tang khyndiat eh ka jaka na ka bynta ka jinglong pdeng .

Ki kam pynroi kim dei satia ka nongshun. Ka jingioh ia ki tip kiba bakla bad ka jingbym shaniah, pynban, ki lah ban long ki nongshun. Ka jylla kan ym lah ban iaid shakhmat lada ki jingthmu ki iatakhuh bad ki jingpyrshah, kumjuh ruh kan ym lah ban kiew lada ka leh lyndet ia kaei kaba dei hok.

Ka jingeh, namar kata, kam dei satia ka jingjied hapdeng ka jingpynroi bad ka jingpynneh pynsah, ka dei ban pynthikna ba kawei kan ym wan ha ka jingduhnong jong kawei pat.