Shillong, Iaiong 18: Ka Maram FC ka la iai bteng iaka jop haka jingïalehkai Football jong ka lympung 5th Meghalaya State League, da kaba jop da 4-1, watla kala shah thep nyngkong ha ka Balmanduri FC ha ka thup Group G kaba la long ha Williamnagar.
Ha kiwei pat ki jingïalehkai jong ka Group F, ka Lawbah SC watla kala shah thep nyngkong hynrei kala lah ban jop da 3-2 ïa ka Umlakro SC ha Mairang.
Ka Maram FC kaba don hapoh ka Tura District Football Association ka la jop da 3-2 kol pyrshah ïa ka A’chik SCO Rongjeng ar sngi mynshwa bad mynta ka sngi ka la jop khambun goal pyrshah ïa ka Balmanduri, kaba dang ïakhun ïa ka MSL kaba nyngkong eh.
Ka Balmanduri ka la ïoh ban thep goal nyngkong eh ha ka minit kaba 40 lyngba u Ganapati Rabha hynrei ka kylla miet ka Maram FC kala ioh ban thep haduh 4 goal lyngba u Santosh Teron (51’), u Bris Taro (66’) bad u Jakchim K Marak (84’, 88’).
Kumjuh ruh ka Umlakro ka la ioh ban thep goal nyngkong haja jingialehkai kaba la long ha Mairang lyngba u Georgesteven Thangkhiew ha ka minit kaba 21 hynrei tang hapoh ar minit ka jingïakhun, ka Lawbah kala ioh pynphai lyngba u Mebadonbor Shangpliang (40’) bad u Fini Frankly Ramsiej (42’).
U Georgesteven u la thep biang ha ka minit kaba 61 hynrei u Substitute ka Lawbah u Kitborlang Sohtun (81’) u la ïoh ban khur 3 poiñ da ka goal ban pynjop 20 minit shwa ban kut ka jingialehkai.
Ka MSL kan wanphai biang da ka 8 tylli ki jingïalehkai haka 20 tarik Iaiong ki ban sdang 3 baje kata ha Group A (Shillong SSA Stadium) -Umkaber SCC vs Nongkseh SSCC
Group B (Shillong MFA Ground) – Mawphu SC vs Nangkiew Irat SC
Group C (Amlarem) – Lamin XI SCC vs Mawlai SC
Group D (Khliehriat) – Ladthadlaboh SC vs Jalaphet Pyrdung SC
Group E (Wahiajer) – Lamyrsiang SCC vs Shillong Lajong FC
Group F (Mairang) – Mishon SSCC vs Umlakro SC
Group G (Williamnagar) – Attong Matgrik FC vs A’chik SCO Rongjeng
Group H (Mawkyrwat) – SS Umdang Pyllun vs Rangdajied United FC
