Shillong, Iaiong 18 : U Nongialam ka BJP bad MLA ka Pynthorumkhrah Bah AL Hek ha ka sngi Saitjain, ula tyrwa ia ka ticket jong ka party sha u Chief Secretary barim ka Jylla Bah Donald P Wahlang, ban iakhun ha ka elekshon shiteng samoi ban wan jong ka Shillong Lok Sabha.
“Nga la leit iashimbynta ha ka jingialang pyndon burom khatduh ia u Bah Wahlang bad nga la pynpaw ba mynta ba ula shongthait, ula long laitluid ban trei. Nga la tyrwa ban ai ha u ia ka ticket ba un iakhun ia ka elekshon shiteng samoi ban wan lada u kwah ban iakhun” ong u Bah Hek.
Ula kren ia kane hadien ka jingialang pynkup burom ia u Bah Wahlang bala pynlong da ka All Meghalaya Priamry School Teachers Association ha Nongmensong hynne ka sngi Saitjain.
U Bah Donald ula shongthait kum u Chief Secretary ka Jylla ha u snem bala lah.
Ka shuki MP ka Shillong Lok Sabha kala sah thylli hadien ka jingiap noh u MP ka VPP Dr Ricky AJ Syngkon ha ka 19 tarik u Rymphang/
Dang shen, u Bah Hek ula pynpaw ba u Myntri Sorkar bad MLA ka South Shillong Bah Sanbor Shullai, u dei uwei napdeng ki san tylli ki kyrteng bala phah sha ki Nongialam ka party ha Delhi na ka bynta ka elekshon shiteng samoi ka Shillong Lok Sabha, bad pynpaw ia ka jingsngewskhem ba ka BJP kan jop ia kane ka seat.
“Ngi la buh hakhmat eh ia ka kyrteng jong u (Sanbor) mynta. U dei uba biang eh na ki kyrtong khamtam ma u ba u dei u Myntri Sorkar un iakhun ia ka elekshon shiteng samoi. Namar baroh kin kyrshan ia u Bah Sanbor abd ngin pynthikna ban gin trei shitom bha ban pynthikna ba un jop ha kane ka elekshon shiteng samoi mynta ka kynti” ong u Bah Hek.
