Shillong, Jylliew 15 : Ki Nongialam riewrim ka sain pyrthei ba pawkhmat ka Jylla, kila batai antad (predict) ba ka Elekshon MLA-2023 kan dei ka madan ialeh jong ki artylli ki seng sain pyrthei ba paw –ka National Peoples Party (NPP) bad ka United Democratic Party (UDP), ban ioh thaw ia a sorkar ka ban shimti ia u lakam ka synshar khadar ha Jylla.
Hynrei ha ka jingiohi jong kine ki riewrim ka sainpyrthei kila ong ba ka Meghalaya hi kan dang ioh ia ka sorkar synrop (coalition Gvernment) kampher la kine ki artylli ki party ki khlain katno katno ruh bad ka jingkylli kaba mih ka long ba mano napdeng kine ki ar party kin iaknieh ban long ki nongialam ha kane ka sorkar synrop.
“Ka Meghalaya hi kan ym lait na ka jingioh ia ka sorkar synrop la ka long kumno kumno ruh. Kan ym don kawei ruh ka party ka ban ioh ia ka obsolute majority (palat 31) lait na ka single largest (ba shu bun paid tam ha ka jingdon MLA” ong u Bah S.D Khongwir, uwei na ki riewrim ba pawkhmat ka Jylla uba dei ruh uwei na ki nongseng ia ka United Democratic Party.
Une u radbah ka sain pyrthei ula pynkynmaw ba ka Jylla naduh ba ioh iala ka jong ka Jylla haduh mynta bala kynjoh 50 snem, ka dang ioh tang kawei ka Sorkar ba synshar tang da kawei ka Party bad kata ka party ka dei ka APHLC ha u snem 1972 kaba la jop haduh 32 seat.
Haba kylli, u Bah S.D Khongwir ula ong “Na ka jingpeit jong nga hi, kane ka Sorkar MDA ka lah ban wan phai biang ha u 2023 ban synshar ia ka Jylla sa san snem hynrei kane ka shong pat ha ka jingiapynbeit jong ki Party khamtam ka NPP bad UDP”.
Une MLA barim ka Mawlai uba la bat ruh ia shibun ki kam kum u Myntri Sorkar ha ki snem bala leit noh, ula ong ba ka jingpait jingpra jong ka Congress ka dei ka kabu ia kine ki artylli ki Seng (NPP-UDP) ha ka jingiakhun jong ka elekshon MLA 2023 ban long ki party ba bun paid eh ki MLA.
Haba pynshai ia kane, u Bah S.D Khongwir ula ong “ Kumba paw mynta hi, kala artatien ba ka Congess kan dang lah khie khieh. Ha ka jingpeit jong nga hi, imat ka Congress kam I don jaka shuh”.
“Ka jingkylli kaba mih mynta ka long ba haduh katno ka AITC kaba don 12 ngut ki MLA hapoh ka jingialam u Dr Mukul Sangma kan lah ban thaw pyrthei ha kane ka elekshon ban wan. Na ka jingpeit jong nga, ka AITC hi ka ikop khlain ha Ri-lum Garo hynrei ym lah pat ban batai ba haduh katno kan ktah ia ka NPP” ula bynrap.
