Agartala, Nailur 12 :U Myntri Rangbah (CM) ka Tripura, u Manik Saha ula kynnoh ba ka CPI-M kala pyrshang ban wanrah da ka jingiapher hapdeng ki trai shnong bad ki nongshong shnong kiba dei ki bar jylla na ka bynta ki jingioh nong ha ki kam sain hima sima.
Na ka liang u CM ka Tripura ula kynnoh ba ka sorkar Left Front kaba la dep ka dei kaba donkti halor ki kam iaumsnam ha ka jylla. “Kumba kalong hi ka CPI-M ka ju leh ia ki kam pyntriem ba shyrkhei haba ki synshar ha kino kino ki jaka,” kynnoh u CM ka Tripura, u Manik Saha.
Ia kane u CM ka Tripura ula pynpaw haba kren ha ka jingialang jong ka seng BJP ha Kakraban kaba hapoh Gomati district ka jylla.Nalor kata ula ong ruh ba ki nongialam jong ka BJP ha Tripura kin pynlong ka jingleit iakynduh ia ki lanot kiba ngat ha ki jingshah thombor ha ki briew jong ka CPI-M.
Nalor kata u Saha ula ong ruh ba ka BJP kan ialap bad pynshai hapdeng ki paidbah nongshong shnong ka jylla kumno ba ka Left party kala leh ia ki kam pyntriem tang ban ioh ha ka bor.
Haba kren halor ka ilekshon assembly ka ban wan ha Tripura, u Manik Saha ula pynpaw ia ka jingsngew skhem ba ka BJP kan thaw biang ia ka sorkar ka ban wan ha ka jylla.
“Ngin ioh ia ka jingjop ha kiba bun tylli ki seat ha kane ka ilekshon assembly ka ban wan ha ka jylla,” ong shuh shuh u CM ka Tripura.
