Agartala, Nailur 12 : Ka jingiakynad ka dang iai bteng ha ki bynta jong ka Killa kaba hapoh Gomati district ka Tripura hadien ba kala mih ka jingiakynad hapdeng ki arkynhun ki nongshong shnong namar ka jingsngew iapher jaidbynriew.
Kane ka jingiakynad kala khie kynsan hynne ka step sngi Nyngkong kaba la wanrah ka jingmynsaw ia kumba phra ngut ki briew.
Kane ka jingiakynad hapdeng kine ki arkynhun ki nongshong shnong kala jia ha ki bynta jong ka Killa kaba hapoh Gomati district ka Tripura namar kawei ka lyngkhot jaka jong ka tnat forest kaba don hapdeng ka jingiakynad.
Ki nongshong shnong kiba dei ki trai shnong ha ka thain kila kynnoh ba kumba 28 ngut ki longiing Muslim kila sdang ban shong ban sah ha katei ka jaka khlaw kaba don hapdeng ka jingiakynad ia kaba kila kam ba kadei ka jaka sorkar.
Katba na ka liang kitei ki longiing Muslim kila kam ba kila ioh jingbit ban shong ban sah ha kane ka jaka, katba ia ka jingkyrpad ka jong ki yn dang pynsngew da ka iingbishar.
“Naduh kine ki khyndiat snem ba la dep kila don shibun ki khep kiba la wanrah jingeh hapdeng kine ki arkynhun ki nongshong shnong,” ong u SDPO ka Udaipur, u Dhurba Nath.Ha katei ka jingiakynad ba dang shen kawei ka kali pulit kala shah thang dusmon.
Ha kawei pat ka bynta, kine ki nongshong shnong kiba dei ki Muslim kila kam ba kila ia aireng markylliang hadien ba kila ngat nyngkong ha ka jingshah thombor da ki tiar pynmynsaw, kum ki wait, ki nar rod bad kiwei pat.
Hadien jong kane ka jingjia na ka liang ki bor sorkar kila pynjur ia ka jingpahara ha kane ka jaka khnang ban khanglad na ka jingiakynad kaba lah ban nang jur shuh shuh.
