Shillong Naitung 18: Haduh 310 ngut ki nong India, Nepal bad Bhutan ba kynthup ia 95 % ki samla kiba pule hapoh ri Bangladesh, hynne ka sngi Palei kila wan poi ha Land Port Authority, Dawki hadien ka jingphet na Ri Bangladesh kaba don hapdeng ka jingkulmar.
Na kine ki 310 ngut, haduh 202 ngut ki dei ki Nong India, 101 ngut ki dei na Nepal bad 7 ngut ki dei na Bhutan.
Ia kane la pyntip da ka Directorate of Information & Public Relation (DIPR) haba iathuh ba na ki nong India, haduh 198 ngut ki dei kisamla pule ba kynthup ia 67 ngut kiba dei na Meghalaya bad 131 ngut ki dei na kiwei ki Jylla bad 4 ngut ki dei ki nongshang kai pyrthei.
La iathuh ba 101 ngut ki nong Nepal bad ki 7 ngut ki nong Bhutan ki dei ki samla pule kiba pule ha Bangladesh
La pyntip ba kine ki samla pule kiba la wan poi, kila mih na ICP Dawki ha ka por 6:45 baje janmiet.
U Myntri Rangbah ka Jylla Conrad K Sangma ula pyntip ba ka Sorkar Meghalaya kala shimkhia ban iakren bad ka Ophis High Commission ka India bad Bangladesh nalor ka Land Port Authority bad ka Exporter Association. Ula pyntip ba ka Sorkar kala shim ia baroh ki sienjam ba donkam ban pynthikna ia ka jingwan phai suk ki samla ka Meghalaya na Bangladesh.
Ka jingiakhih ha Bangladesh kala sdang naduh ka 1 tarik Naitung ban pyrshah ia ka rai da ka Sorkar Bangladesh ban ai biang ia ka bhah thungkam ba 30% ia ki nonghiar pateng jong ki briew kiba iakhun ia ka thma ioh Laitluid ka Ri ha u snem 1971.
Da ki hajar ngut ki samla pule na ki jaka pule ka Sorkar bad shimet, kila pyrshah jur ia kane ka jingai bhah namar ka jingsheptieng ba kin duh ia ki lad lada la bhah noh haduh 30% sha ki bahaiing hasem jong ki briew ba iakhun thma laitluid.
