Shillong, Naitung 18: Haduh 175 ngut ki samla pule ka jylla Meghalaya, Assam bad na Nepal, kiba pule hapoh ri Bangladesh, hynne ka sngi Palei kila wan phai sha ka ri India lyngba ka Land Port Authority, Dawki.
Ka jingwanphet noh kine ki samla na ka ri Bangladesh ka dei hadien ba kala mih ka jinghuri hura hapoh katei ka ri baroh kawei halor ka bhah thungkam thungjam ha ki kam sorkar.
“Haduh hynne ka sngi kila don 175 ngut ki samla pule kiba la wan na ka ri Bangladesh shapoh ka ri India lyngba ka Land Port Authority, Dawki” pyntip u Assistant Nodal Officer u Gamaliyel Thomas.
Ula ong, kine ki 175 ngut ki samla pule kiba la wan phai noh shapoh ka ri India ki kynthup na ka jylla Meghalaya, Assam bad bun ngut ki samla pule na ka ri Nepal. Ula ong ba 55% kidei ki samla pule na ka jylla Meghalaya.
Kat kum ka khubor ba ioh lum la iathuh ba 63 ngut ki dei na Meghalaya, 95 ngut ki dei na Nepal bad 7 ngut na Bhutan.
U Thomas ula iathuh ba kila pynbiang ia ki bus na ka bynta ka leit ka wan ka jong kine kiba wanphai.
“Nga lah iakren bad kine ki samla bad kila pynpaw ba kim shym la mad ia kano kano ka jingeh ne kano kano ka jingjia ha ka jingwanphai ka jong ki hynrei kiba bun hi, kila dap da ka jingtieng bad jingsyier ia ka jingjia hapoh ka ri Bangladesh” ong u Thomas.
U Thomas ula ong, ba lada ka huri hura ka dang iai bteng, la khmih lynti ba kin dang bun ki samla pule k iban wanphai bad kumta kila long kiba la pynkhreh ban pdiang bad ban ai jingiarap ia ki samla pule kiba na ka ri India.
U Myntri Rangbah ka Jylla Conrad K Sangma ula pyntip ba ka Sorkar Meghalaya kala shimkhia ban iakren bad ka Ophis High Commission ka India bad Bangladesh nalor ka Land Port Authority bad ka Exporter Association. Ula pyntip ba ka Sorkar kala shim ia baroh ki sienjam ba donkam ban pynthikna ia ka jingwan phai suk ki samla ka Meghalaya na Bangladesh.
Ka jingiakhih ha Bangladesh kala sdang naduh ka 1 tarik Naitung ban pyrshah ia ka rai da ka Sorkar Bangladesh ban ai biang ia ka bhah thungkam ba 30% ia ki nonghiar pateng jong ki briew kiba iakhun ia ka thma ioh Laitluid ka Ri ha u snem 1971.
Da ki hajar ngut ki samla pule na ki jaka pule ka Sorkar bad shimet, kila pyrshah jur ia kane ka jingai bhah namar ka jingsheptieng ba kin duh ia ki lad lada la bhah noh haduh 30% sha ki bahaiing hasem jong ki briew ba iakhun thma laitluid.
